用人話介紹 Accumulator！佢到底係咩嚟？
前言
2008 年國際金融風暴嘅時候，我啱啱八歲。嗰時新聞日日都講到 Accumulator (累計期權) 係一樣好恐怖嘅嘢，搞到好多人家破人亡。但係當年嘅我一直唔明咩係 Accumulator，亦唔知點解佢咁恐怖。
嚟到 2021 年，我因緣際會再次接觸到 Accumulator，亦都俾到我一個機會去認識佢。呢篇文嘅目標，就係希望如果我俾八歲嘅我睇，佢都可以明少少咩係 Accumulator。
(ok for real I don't think I would have understood lol)
Accumulator? 邊度 Accumulate 啊，睇過？
簡單啲，我用兩個人物去講 Accumulator 點運作，分別係投資者 Ian 同銀行 Bob。
話説 Ian 就想買一隻股票 (Ticker: $TONK)。Ian 唔止想買呢隻股票，佢更加係想喺嚟緊幾個月儲呢隻股票，慢慢買入。Ian 作為一個投資者，自然想用平啲嘅價格買入，而呢個時候啊銀行 Bob 就行過嚟揾佢：
Bob：「喂 Ian 呀，聽講你想每個月買少少嗰隻 $TONK ，又想平啲噉入貨喎。」
Ian ：「係啊係啊，我嚟緊 12 個月都諗住買少少，你有咩好嘢推介先？」
Bob ：「嗱不如噉。依家隻 $TONK 就 $100 一股啦，不如我嚟緊每個月都用 $90 蚊賣 10000 股俾你，噉樣你可以平 10% 入貨囉，點睇？」
Ian ：「喂又好似幾正喎，橫掂我係咪都會買，有得賺 10% 梗係賺咗佢先，就噉話啦！」
上面嘅情景就大概講出 Accumulator 個邏輯大概係點。佢就係一個雙向嘅承諾：
投資者應承 12 個月之內，每個月用固定價錢，買入固定數量嘅一隻股票；
銀行應承 12 個月內，每個月用固定價錢，賣出固定數量嘅一隻股票。
而嗰個固定價錢就叫 Strike Price，行駛價。
蝕本生意？
Ian 作為投資者雖然聰明，但係銀行 Bob 都唔笨。無理由 Bob 咁好死肯用平市價成 10% 賣隻股票俾 Ian 㗎嘛？銀行噉做咪即刻蝕好多？
Bob：「嗱 Ian，我肯賣俾你啫，但係我都要做生意㗎嘛。依家隻 $TONK 就 $100 一股，我都唔想蝕太多畀你，啱唔啱先。」
Ian：「都係嘅，我都已經賺緊 10%，你有咩諗法？」
Bob：「不如噉啦，如果隻 $TONK 升到 $105，我就唔再賣俾你喇。我都要揾食㗎，如果升到成 $110 我都要繼續用 $90 賣畀你，我咪好慘？」
Ian：「好啦，不過我真係好想買入多啲 $TONK。你應承我，即使 $TONK 第一個月就升穿 $105，你都依然要用 $90 賣返咁多比我先，第二個月之後嘅就由你取消啦，好唔好？」
Bob：「好，殺你。」
上面嘅情景，就描述咗 Accumulator 有限盈利嘅問題。
如果 Accumulator 升穿某個價錢，Accumulator 就會自動終止，所以投資者嘅盈利，點都唔會超過嗰個價錢。
不過為咗引投資者入局，銀行通常都會保證第一個月會用協定嘅 Strike Price 行駛價賣俾投資者嘅。
而「升穿就終止合約」嘅呢個價錢，就叫做 Knock-out price，觸及價。
魔鬼總在細節中
當 Ian 好開心可以用呢個低啲嘅價格買入 $TONK 嘅時候，佢唔知其實 Bob 其實伏緊佢。
上面就講咗 Ian 嘅盈利有限，但係 Bob 冇講到嘅就係 Ian 嘅虧損。Ian 嘅虧損，同買任何股票一樣都係可以接近 100% 嘅。
Bob：「喂你噉講又唔公平喎，買咩股票都可以蝕足 100% 㗎啦，你憑咩話我伏緊 Ian？」
?
Bob：「係啊同緊你講嘢啊。大家打開門做生意，個個都知買股票有風險㗎啦，依家個風險又唔係無限大，咪同平時買股票一樣，一嚟就知最多蝕幾多㗎啦！」
噉其實 Bob 都錯唔晒。要了解 Accumulator 毒個位喺邊，就要用幾幅圖解釋吓。
糖衣毒藥
首先，我哋可以畫幅圖睇睇 Strike Price 行駛價同 Knockout Price 觸及價係點嘅樣先：
上面嘅 $100 係 $TONK 嘅現價；
綠色線 $105 係 Knockout Price 觸及價，市價一超越，個 Accumulator 就會即刻停止；
紅色線 $90 係 Strike Price 行駛價。投資者 Ian 承諾每個月會用 $90 向 Bob 買入 100 股嘅 $TONK。
所以，如果 $TONK 喺 $90 至 $105 嘅範圍浮動，Ian 就能夠用一個低過市價嘅價錢買入 $TONK，賺到錢；但係，如果 $TONK 嘅市價跌穿 $90，Ian 就需要用高過市價嘅價錢買入 $TONK，變咗蝕錢；
如果要用幅圖嚟表示，就會好似上面噉。
綠色嘅範圍，就係 Ian 能夠賺錢嘅 $TONK 市價；紅色嘅範圍，就係 Ian 會蝕錢嘅價格。
了解到幅圖點 Plot，就可以解釋點解 Accumulator 係一個糖衣毒藥。
由於 Accumulator 嘅 Strike Price 行駛價永遠都係喺市價下面，喺 Accumulator 嘅頭幾個月，Ian 往往可以用一個低過市價嘅價錢買入 $TONK；
但係隨住時間過去，$TONK 嘅價錢上落嘅幅度自然越嚟越大，Ian 蝕錢嘅機會亦都越嚟越高。
喺上面幅圖，藍色線代表 $TONK 嘅市價走勢範圍*。由於隨住時間過去，走勢嘅方向理應慢慢擴闊，所以我哋都見到兩條藍色線包涵嘅範圍慢慢擴大。
用呢幅圖睇，可以見到喺一開頭嘅時間，Ian 用 Accumulator 賺錢嘅機會相對比較高；但係隨住時間過去，Ian 蝕錢嘅機會自然越嚟越高。但係 Ian 嘅最大盈利依然限喺同樣嘅金額。
*市價走勢就當然唔會係畫兩條線就得咁簡單。呢個 graph 純粹係用嚟 illustrate 點解 accumulator 前期容易賺錢，但係後期容易蝕錢。上面嘅圖亦都未必準確，見下面「其他重要資訊」嘅部分。
點解 Accumulator 害死咁多人
正如 Bob 所講，其實 Accumulator 都唔會蝕超過 Ian 承諾嘅總金額 ，噉點解佢喺 2008 年害死咁多人？先唔講大部份 Accumulator 都有槓桿嘅元素，凈係睇上面幅圖，已經足以刻畫 Accumulator 糖衣毒藥嘅性質。
由於 Accumulator 前期易贏錢，而後期容易輸錢，好似 Ian 噉嘅投資者好容易喺頭幾個月覺得 Accumulator 係一個好容易贏錢嘅工具。而正如上面所講，喺頭幾個月，Ian 未必見到後期 Accumulator 容易輸錢嘅特性。
喺呢個「Accumulator 容易贏錢」嘅幻覺之下，Bob 就可以誘惑 Ian 整多啲 Accumulator。趁 Ian 仲未發現之後嘅 downside 嘅時候，銀行可以同 Bob 率先 form 多啲 Accumulator，而當之後 Ian 發現佢蝕好多嘅時候就已經太遲。佢每個月蝕嘅金額，分分鐘比佢一開頭想象中多。
Accumulator 另一個毒嘅地方，就係佢嘅虧損係好難走得甩嘅。假設 Ian 喺第六個月發現自己蝕緊好多錢，佢都仲需要用同樣價格向銀行買多六個月嘅 $TONK。而呢個仲未計佢喺頭幾個月俾 Bob 呃去買多啲嘅 Accumulator，而每張 Accumulator 都要俾足 12 個月。
呢個亦都係點解 Accumulator 亦都被稱為 "I will kill you later" 嘅原因。Accumulator 因為佢嘅特性，前期可以用啲小甜頭引人入局，之後再用 12 個月嘅期限捆綁投資者。而呢個亦都係點解 Accumulator 當年搞到咁多人家破人亡。
Key Takeaways
Accumulator 係一個雙向嘅承諾。
投資者應承 12 個月內，每個月用一個低過依家市價嘅價錢買入相同數量嘅股票，而銀行應承每個月用返同樣價格賣俾投資者；Accumulator 嘅盈利有限。
銀行唔敢做蝕本生意，所以如果個股票升得太勁，高過雙方承諾嘅價格太多，銀行唔會再賣俾投資者；Accumulator 虧損可以接近 100%。
即使股票價格跌到 0 蚊，投資者依然需要每個月用承諾嘅價格買入同樣數量嘅股票，冇得話走就走；Accumulator 係糖衣毒藥。
頭幾個月容易賺錢引人入局，但係隨住時間過去，虧損機會同幅度可以大幅提升。
我嘅睇法
我自己就覺得 Accumulator 個性質有啲似保險。不過今次唔係向銀行買保險，而係賣保險俾銀行。攞返上面個例子，如果 $TONK 個價格喺 $90 - $105 中間浮動就還好，甚至跌到 $80 都可以話係一個 fair price for the potential profit。
但係 Accumulator 伏個位，就係在於投資者需要幫銀行食晒成個 $TONK 大跌嘅時候嘅風險。如果 $TONK 跌到 $50 甚至 $30，投資者依然需要幫銀行用 $90 蚊接貨。喺銀行嘅角度睇，賣個 Accumulator 俾個投資者，就好似一份保險噉：俾投資者嗰少少盈利就好似保費，但係當資產價格大跌嘅時候，銀行就有一個保險作為 safety net，保障銀行唔會蝕太多。
而銀行最乞人憎嘅係，好多時唔會向投資者充足披露呢啲 downside risk，呃咗投資者入局就算。雖然依家有晒啲 regulations and compliances ，法例亦都禁止銀行向非專業投資者賣出呢啲產品，但係依然阻止唔到呢啲事情發生。
關於 Accumulator 嘅 landmark case，就係關於一堆老夫婦，因為俾 Bank of Singapore 呃所以用晒畢生積蓄買 Accumulator，然後蝕晒。好彩嘅係個 Court 最後都判返對夫婦贏，攞返啲錢。但係佢哋只係少數，好多投資者都冇佢哋咁好彩。(Chang Pui Yin & Ors v Bank of Singapore Ltd (CACV 194/2016))
我自己就覺得，好多時候呢啲嘅銀行推銷員真係好狗。尤其係呢啲產品，銀行嘅利益同客户明顯有衝突，都依然可以 sell 俾啲客真係幾誇張。雖然我自己覺得 financial literacy 係每個人嘅必修課，但係都唔代表可以當晒所有人都有相關嘅知識，然後就 sell 呢啲高風險產品俾佢哋㗎嘛。
唉，不過另一樣嘢就係貪念。人唔貪心咪冇事囉，其實邊有咁大隻蛤乸隨街跳吖。
其他重要資訊
1. 非投資邀約，純娛樂性質。我並冇持有任何投資相關資格，亦無接受過相關課程訓練。
2. Accumulator 嘅本質唔係純粹一個「承諾」，而係投資者同銀行分別 write/purchase put option, 以及 purchase/write call option。不過要用呢種方式講實在太複雜，所以簡化咗。有興趣嘅可以去 wiki 睇。
3. 上面嘅圖實在將事實簡化咗好多。簡化個位主要係喺藍色線價格走勢上面。資產價格可以突然大跌或者大升，個 range 亦都未必係直線嚟。不過「前期容易賺錢，後期蝕錢機會更大而且走唔甩」呢個依然冇錯嘅。
4. Accumulator 嘅金額就梗係唔止咁少啦，郁下每張 Accumulator 嘅 total exposure 都係 USD500,000 起跳。
5. Accumulator 唔淨只可以應用喺股票，亦都可以應用喺外匯甚至任何嘅資產。
6. Accumulator 有個孖生兄弟，Decumulator。有興趣可以睇睇。
