阿富汗人，阿拉伯數字
想講講阿富汗。準確啲講，係想講阿富汗「人」。
三年前讀 IB 嘅時候，要讀一本叫做《追風箏的孩子》嘅書。本書係一個跟隨屋企人逃到美國嘅阿富汗人寫嘅。而因為要就住本書做 presentation，當年都讀過少少關於阿富汗嘅事。
然而當年讀嘅時候，發覺我有一個問題。對於當年得 17 歲嘅我嚟講，阿富汗發生嘅事情實在太遙遠，而且喺資料搜集嘅過程入面，見到嘅都只有文字同數字。我喺睇相關嘅資料嘅時候，只能夠覺得佢係一堆資料，極其量只係一個發生喺他方嘅故事。
我發覺我難以代入阿富汗人經歷嘅痛苦。
即使我透過本書知道佢哋經歷過啲咩，本書亦都觸動到我，但係我知道我永遠唔能夠喺真正意義上完全感受到佢哋嘅經歷。
係咪我冷血？定係我諗得唔夠多？我唔知。但我見到嘅係，當每一個阿富汗人經歷嘅痛苦，變成一個又一個嘅「死亡人數」嘅時候，佢哋嘅故事就被抹殺。而我做資料搜集嘅時候，只能夠見到一個又一個被簡化為數字嘅檔案。
我甚至乎差啲忘記每一個數字，都代表住一個人。直到今日我都依然面對緊呢個問題。
「Death toll: 100」代表嘅唔單止係 100 個人死咗，更加係「死咗一個人」呢件事發生咗 100 次。*
然而我冇能力去認識背後每個人受到嘅壓迫，同壓力。
而更加諷刺嘅係，我即使可以知道每個人受到嘅壓迫，壓力，我都好難真正理解，冇辦法感同身受。
《追風箏的孩子》講到有男仔喺塔利班嘅統治下被當為性奴。而女仔甚至連做性奴取悦男人嘅資格都冇。
我有冇能力理解佢哋受到嘅痛苦，即使我知道佢哋面對啲咩？
冇。
呢個或者真係一個 First World Problem。我冇能力去理解佢哋嘅痛苦，本身已經係一個奢侈。我甚至可以坐喺屋企棟高隻腳喺度寫呢篇嘢，本身就充滿荒謬同諷刺。我憑乜？
冇。
我所謂嘅關心，聲援，到底係咪將每個阿富汗人視為一個「人」？抑或對我嚟講，佢哋都只係一堆數字，或者只係由一個個字母砌成嘅文章？
就好似阿拉伯數字**噉，將概念抽象化，凈係留底符號。
而如果我冇能力視佢哋為人，冇能力由佢哋嘅角度去明白佢哋嘅痛苦，我又到底係咪真係關心緊佢哋？
我冇一個好好嘅答案。唯有從一個個真實嘅自白入面，慢慢了解佢哋嘅處境，令到我對佢哋嘅了解唔停留喺數字，而係以「人對人」嘅層面理解。
琴日碌 twitter ，呢條 tweet 幾觸動到我，希望讀到呢度嘅可以撳入去睇睇。
我未必能夠完全感受到阿富汗人面對嘅痛苦，但希望至少可以唔純粹將佢哋視為數字或者符號。
*如果有人知呢句本身係邊個寫嘅，麻煩話返俾我知，thanks。
**阿富汗並唔係阿拉伯嘅一部分。用阿拉伯數字為題，純粹取「阿拉伯數字」將概念抽象化，甚至乎完全脱離同阿拉伯本身嘅關係呢一點。希望唔會因為噉攪亂大家。
