「贏」嘅真正意思
我一直都係一個好 competitive 嘅人，但係依家先學識咩先叫贏。（ps：冇「良性競爭」嗰啲 BS）
Photo by Keith Johnston on Unsplash
我以前都玩過唔少比賽，甚至乎依家某程度上都繼續比賽緊：要讀好每一科攞高啲 GPA，同人爭 training contract，都可以睇成一個比賽。喺呢啲環境入面生活，就訓練咗我成為一個好習慣競爭嘅一個人，甚至乎可以話係開始享受競爭。
就例如喺唔同嘅 internship 入面，當意識到自己喺某啲方面冇人哋咁好，就會好有動力去觀察人哋有啲乜係做得好，而我又可以點樣先做得好過佢；而當去到最尾見到自己做到啲人哋做唔到嘅嘢，又或者做得好過人哋，得到認同嘅時候就會好有成功感。喺返 intern 嘅 context 入面，每次去嘅公司都想俾 training contract 我，就係一個我攞到成就感同認同感嘅來源。
Photo by Joan Kwamboka on Unsplash
當然呢樣嘢自己唔係一件壞事，甚至乎可以話係驅動我繼續做好啲嘅動力來源。當每次我去貼近自己能力範圍嘅盡頭去發揮嘅時候，都得到回報，就令我更加願意每次都去拓展自己嘅能力範圍，令自己表現更好。但係我就發現原來呢個競爭嘅模型唔係喺所有情況都適用，有時候做得好過人哋唔係個遊戲嘅目標。
想講嘅係，我冇乜興趣喺度講咩良性競爭 vs 惡性競爭嗰啲概念。良性 vs 惡性競爭概念呢個討論出現得太多次而且都係一個幾悶嘅topic：唔通會有人唔知良性競爭，一邊合作一邊互相學習係更好咩？今日想講嘅係一個比呢個概念更進一步嘅發展。
Photo by Frida Lannerström on Unsplash
呢個概念叫做 finite game vs infinite game。Finite game 嘅意思，係講一個有終點嘅遊戲：例如可能係好似返 intern 噉樣，一個月之內想爭到份 training contract；又或者好似考試噉，喺考試攞到成績就係個終點。
而 infinite game 嘅分別，就係在於佢哋冇一個明確嘅終點，亦都冇一個明確嘅勝利條件。要「贏」到一場 infinite game，目標只有一個，就係 keep 住有得玩呢個遊戲。例如我寫 blog，我嘅目標唔係要每篇 blog 有 XXX 個人撳入去睇（雖然如果越多人睇同 share 出去我會好開心），而只要我 keep 住每個禮拜都出到一份反映到我自己諗法嘅 blog，我就已經贏咗。又例如同朋友嘅關係亦都係一個 infinite game，只要大家 keep 得住見面，繼續有偈傾就已經贏咗，而冇一啲明確嘅標的要達到。
而如果經常將某啲情況視為一個 finite game，就經常有問題出現。當將面前嘅遊戲視為 finite game，容易會以為達成某個標的就係唯一目標，其他所有嘅因素都可以犧牲，反而會令自己處於一個不利嘅位置。我之前返工聽啲有經驗嘅律師講，好多時候即使喺某單 case 自己嗰邊係有明確勝算，但都唔會 push 到盡喺對方身上攞晒所有認得嘅賠償。係，的確自己間公司係有權去要對家俾返一嚿錢翻嚟，而如果將呢但 case 視為一個 finite game，當然想 push 到盡攞晒所有着數先啱。不過尤其係營商環境往往係一場 infinite game，有得繼續同行內嘅人繼續做生意就已經贏咗，所以有時唔 push 到盡，留一線，等個行業知道自己唔會棒打落水狗，反而更加幫到自己間公司喺未來揾到更加多機會。
我自己覺得呢個 finite game vs infinite game 嘅 mindset 都幾有用。好多時候我自己會 tunnel vision 咗，以為某場遊戲係一個 finite game，然後希望達成某啲明確標的，但係嗰個遊戲嘅本質其實係一場 infinite game，只要有得繼續玩就係贏。
Photo by Mauro Gigli on Unsplash
譬如同朋友出去玩 board game 係一個幾好嘅例子。玩 board game 睇落有一個好明確而定義咗嘅勝利條件，而個 board game 嘅長度亦都有明確嘅限制，睇落好似一個 finite game：達成勝利條件就係贏。不過其實同朋友出去玩 board game 本質其實比起一個finite game 更加似一場 infinite game，想要達到嘅係可以繼續同朋友以後可以繼續出嚟玩，而唔係贏咗場 game 就算。而只要大家透過場 board game 鞏固到個關係，繼續見面，就係贏緊場 infinite game。
去判斷咩情況係一個 finite game，所以有必須達成嘅目標，以及幾時係一場 infinite game，目標只係要keep住有得玩落去，係一個幾難嘅課題。好多時候啲 infinite game 都會以 finite game 作為包裝：例如返工啲 project 可能睇落好似係一個 finite game，做好 project 就算，但其實返工個目標係希望唔好畀人炒。當然，做好個 project 本身係達成「唔好畀人炒」呢個目標嘅其中一個途徑，不過如果為咗做好個 project 同同事搲爛塊面，就會輸咗場 infinite game。
呢個 mindset 係難嘅。有時的確將面前嘅狀況視為 finite game 先係保護自己應得權利嘅方法，但係又有時去令到自己 keep 住有得玩呢個遊戲先係啱嘅 play。點樣去拿捏中間嘅平衡應該都有啲困難，不過對今日嘅我嚟講，就似乎將自己推向 infinite game 嘅 mindset 先應該更有用。
