成為奴隸 (to-do list 嘅)
自從早兩年開始返律師樓 intern，我成為咗 to-do list 嘅奴隸。
Photo by Eyasu Etsub on Unsplash
好多人覺得用 to-do list 嘅優勢，係在於可以防止自己唔記得要做嘅嘢。呢個諗法都無錯嘅，亦都係 to-do list 最基本嘅用途：確保自己唔會做漏嘢。不過 to-do list 嘅功效唔止防止自己做漏嘢，亦都可以用嚟 offload 自己腦入面盛載嘅資訊，等自己可以多啲腦容量去處理面前嘅 task。
想象吓呢個情況：當自己面前好多 task 要做嘅時候，仲要記住自己有 DEF task 要喺做完 ABC task 之後繼續，然後仲有 GHI task 等緊我。齋係記自己有咩 tasks 要做已經佔用咗大腦好多資源，有咗 to-do list 就可以減輕大腦嘅負擔，亦都方便自己編排每個 task 嘅優先順序，逐件擊破，解決手頭上嘅問題。
Photo by Glenn Carstens-Peters on Unsplash
有一個講法講得好好，就係 ten minutes of planning saves two hours of work。好多時要提升工作速度，就要先放低幾分鐘去制定一個計劃，而 to-do list 就係容許我編排優先次序嘅重要工具。
但係我認為 to-do list 嘅好處遠超呢點。某程度上，我會話用 to-do list 係奪回自己對生活控制嘅重要一環：佢嘅用途遠超工作環境。
Photo by Jason Hogan on Unsplash
當自己慢慢大嘅時候，有嘅自由多咗，亦都多咗情況可以揀做唔做一樣嘢。唔係話噉樣唔好，但係選擇多咗誘惑亦都多咗。想睇書？不過呢條 YouTube 片好似吸引好多喎，不如睇咗先；寫 blog？聽埋呢首歌先做啦。我自己都係一個幾軟弱嘅人，容易受一啲 short term pleasure 吸引。回過神嚟，發現已經冇時間做自己想做嘅事。
呢啲情況尤其喺一啲冇 deadline 嘅 task 度容易出現。如果聽過 Eisenhower Matrix，呢啲其實就係 Important but not urgent 嘅 task。由於呢啲 task 冇佢哋嘅迫切性，自己連做 deadline fighter 嘅機會都冇，就變咗經常會拖吓拖吓，永遠都唔會做呢啲 task。對我嚟講，呢啲 task 可以係寫 blog，睇書，聽 podcast 等等。唔係話自己唔想做呢啲嘢，不過經常會拖延然後唔做。
Photo by Annie Spratt on Unsplash
喺呢啲情況，to-do list 就展現佢嘅用途。如果我期望自己想做一樣 important but not urgent 嘅 task，譬如係每個禮拜寫 blog，我就會將佢放入 to-do list 入面做一個每個禮拜出現嘅 item：禮拜六要定題目，禮拜日出 blog。當整咗一個噉嘅 item 嘅時候，我就可以為自己製造一個 deadline，俾個原因自己去做一啲想做但係冇迫切性嘅 task。
然而呢個方法個問題都明顯：其實呢個都只係一個自己呃自己嘅方法。我自己其實依然可以揀唔去做呢個 task，即係我自己早幾個月都試過一個月先寫一篇 blog 啦。所以都真嘅，其實呢個方法唔足夠，更重要嘅係自己嘅心態。而喺呢個方法入面，所需要嘅心態就係令自己成為 to-do list 嘅奴隸。
Photo by Thomas Bormans on Unsplash
我自己係嚴肅對待 to-do list 上面每一個 task 的。只要 to-do list 上面有一個 task 今日要做，我就會做。例如我每日嘅 recurring task 有 meditation 同埋聽 The Economist 嘅 daily briefing，我就會逼自己去做。只要我持續嚴肅對待 to-do list 上面嘅 task，唔俾空間自己去走盞，令 to-do list 掌控自己嘅生活，我先能夠做都自己想做嘅事。
所以其實成件事有少少諷刺：透過將自己屈服喺 to-do list 之下，我先能夠獲得真正嘅自由。但係諗深一層其實又唔係真係咁奇怪。好多時候我做嘅決定，都係將焦點放喺當下乜嘢最吸引：可能係碌 Twitter 或者上 YouTube 睇片，偏偏當下最吸引嘅抉擇，未必係 long run 自己最想自己做嘅決定，甚至乎經常後悔：「唉又嘥咗一日喺度睇 YouTube」。
所以成為 to-do list 嘅奴隸，先係獲取自由嘅方法。我放喺 to-do list 入面嘅 task，只要係 long run 我想自己做嘅事，就可以令我自己生活入面嘅決定更加貼近 long run 我想自己做到嘅事。透過成為 to-do list 嘅奴隸，我先唔會俾 short run pleasure 控制我嘅行動。
呢個諗法其實就係源於政治哲學家 Isaiah Berlin 提出嘅 Positive Liberty 概念。自由並唔單係講緊自己做嘅決定不受限制（消極自由），要有完整嘅自由，亦都需要解除外在嘅約束，令自己嘅決定係喺一個 global (long run) perspective 都認同嘅決定。由於欠缺一啲好似 to-do list 嘅限制嘅時候，一個人嘅注意容易被一啲短暫嘅享樂偏離，即使一個人嘅決定不受限制，佢都未必係完全嘅自由。要幫到自己奪回一個完整嘅自由，就需要確保自己做嘅決定係一個長遠嚟講自己都會同意自己嘅決定。而我覺得成為 to-do list 嘅奴隸，就係前往呢個方向嘅有效方法之一。
