從根源解決壓力
巴士阿叔曾經噉樣講過：
Photo by Ant Rozetsky on Unsplash
「你有壓力，我有壓力！」「未解決！未解決！」
不過，壓力嘅來源其實喺邊呢？
我自己覺得，壓力往往都係源於個「貪」字。
Photo by Sharon McCutcheon on Unsplash
想象吓壓力平時係點嚟，例如所謂讀書壓力，講穿咗咪係貪心想要一個好啲嘅成績，但係自己嘅能力又未去到嗰個位，咪有壓力。貪好一樣唔屬於自己嘅事物，想令自己攞到，但係嗰樣事物係超越自己控制到嘅範圍嘅時候，壓力就會出現。
掉轉嚟睇，如果一項事物完全喺自己嘅控制範圍之內，係唔會有壓力㗎喎。所謂貪心貪心，其實就想要更多嘅嘢，但係嗰啲嘢又唔屬於自己，呢個貪念就係壓力來源。
Photo by Ruben Hutabarat on Unsplash
所以我覺得呢個 Serenity Prayer 其實講得好好：
Lord, grant me the serenity to accept the things I cannot change,
Courage to change the things I can,
And wisdom to know the difference.
要從根源解決壓力來源，就要解決呢個不切實際嘅貪念。尤其係第一句 “grant me the serenity to accept the things I cannot change“，就係希望有一個平靜嘅心去面對一啲唔屬於自己嘅事物。呢個世界有好多嘢我哋控制唔到：天氣、出身、改卷老師嘅狀態、見工 Interviewer 嘅心情，都係喺我哋控制範圍之外。縱然我哋經常希望呢啲事物可以如我哋自己嘅意思，但係呢個都屬於係貪念嘅一種：想控制唔屬於自己嘅嘢。
不過當然龜縮唔係解決方案，所以先有第二句 “courage to change the things I can”。留喺自己嘅舒適區，將所有事情歸納成為自己冇辦法改變嘅事物，乜都唔做當然舒服，所以先需要改變嘅勇氣。至於要點樣分辨乜嘢係自己能夠改變，乜嘢係超越自己控制，我自己覺得個方法通常係係咪都試咗先，如果失敗咪證明嗰樣事物超越自己控制，到時先放返低囉。
當然唔係樣樣嘢都咁簡單。又翻去讀書壓力呢個例子，其實好多人嘅讀書壓力並唔係凈係嚟自自己，更多時候係嚟自朋輩甚至乎家庭嘅壓力。想象吓如果一個人全家啲親戚唔係律師就係醫生或者 iBanker，佢作為呢個家庭嘅一分子都至少會有無形嘅讀書壓力啦。
要先講嘅係，我比較好彩，暫時仲未遇到呢類型嘅情況；同時每個人遇到嘅難處都唔同，未必一個方法可以通用喺所有情況。但係我學識嘅係，擔心自己控制唔到嘅嘢往往係浪費時間。譬如係擔心人哋嘅睇法，即使嗰個人係自己嘅屋企人，其實都冇意思，只會令到自己嘅負擔更大。既然人哋嘅期望已經造成壓力，點解自己要黐住人哋嘅睇法諗嘢？
甚至乎再進一步。活喺人哋嘅期望之中，就好似焗玩一個人哋制定規則嘅遊戲。無論你玩得幾好，人哋都有能力改變規則，令到你永遠都贏唔到呢場遊戲。人哋嘅貪心都係永無止境，即使你做得幾好，人哋都會有一個貪念要求你做到更多嘅事。真正嘅「贏」，要靠脱離呢個遊戲，為自己製造一個有新嘅規則，能夠自己掌控嘅遊戲，先能夠脱離呢個無限輪迴。
