製造偶像

偶像、idol、アイドル

一、偶像嘅號召力

近幾年觀察到偶像嘅動員力真係好強。喺街會見到 fans 為佢哋整嘅燈箱巴士廣告；上網會見到佢哋用偶像名義籌款捐俾慈善機構；而佢哋為咗偶像嘅週邊同代言產品發揮嘅消費力高到難以置信。到底追偶像呢回事有咩咁特別，而喺呢啲 fans 身上又有咩可以學到呢？

As a record, 我都係一個追 idol 嘅人。雖然偶像喺我身上推動到嘅消費力有限，但係我都觀察到自己都可以容易受偶像影響。早幾日喺度睇一個幾鍾意嘅 streamer 嘅一個 study with me stream，見佢鼓勵啲 viewers 一齊做啲 productive 啲嘅嘢，就聽佢講一齊做，又真係比平時更加專注噉 prep 完一份 tutorial。

所以我就喺度諗，到底點解會咁有效？話晒我都係一個以做 productivity content 起家嘅 content creator，分享過咁多讀書方法，點解唔及一個 streamer 嘅 study with me stream? 莫非我分享嘅方法其實唔係咁有效，或者有一啲更加有效嘅方法我未發現？

我嘗試提出以下模型去解釋點解偶像呢個存在，可以咁有效噉號召唔同嘅人去做一啲佢哋平時唔會去做嘅事，大至大額捐款、大量消費，小至好似我噉突然提升專注度。

首先要意識到嘅係偶像同 fans 之間嘅共生關係。冇人支持嘅偶像係唔能夠成為偶像，偶像嘅存在本身就意味住有 fans 嘅存在。偶像有幾出名，完全取決於有幾多人追佢，而冇 fans 嘅偶像只係普通人一個，同你同我冇分別；
因着呢個共生關係，fans 就牽涉於呢個建構偶像形象嘅過程。當然，偶像（同埋佢背後嘅公司本身）會設置舞台嚟將自己嘅一面呈現俾大眾，協助 fans 建構偶像形象去某一個方向，但係 fans 唔單係一個被動噉接受/拒絕嘅角色，亦都能夠主動參與喺建構偶像形象嘅過程。例子有各種嘅 Fan Fiction，Shipping （將兩個人拉為 couple）甚至乎通靈（透過蛛絲馬跡猜測偶像同其他人嘅關係）等等嘅行為，影響其他人對偶像本身嘅觀感同印象；
而作為一個主動建構偶像形象嘅 fans，亦都令到佢哋喺建構嘅同時建立緊一個「某偶像嘅 fans」呢個身份。呢點有兩個方向會影響到 fans 嘅行為。第一，由於呢個身份本身係一張乜都冇嘅白紙，唯一有嘅線索就係同嗰個偶像有關，自然呢個身份嘅建構，就會以偶像嘅特質作為藍本而發展；第二，由於呢個身份同偶像有直接關連，擁有呢個身份嘅人嘅行動都會令人連繫到偶像，令到呢啲 fans 對自己嘅行為亦都變得警覺，甚至乎會為咗偶像主動建構一個良好形象。

而我覺得呢個模型，就可以解釋點解一個行為，當多咗偶像嘅名就會有額外嘅號召力。當一個行動以偶像之名進行，例如「XXX 後援會」舉行籌款活動，潛台詞就係「XXX 嘅 fans 係善長仁翁」，而如果唔捐嘅 fans，就自然慢慢失去作為「XXX 嘅 fans」呢個身份。假設每個 fan 都會想維持呢個身份，自然捐錢呢個行動有額外嘅號召力。與此同時，作為一個 fan，自己都會希望向外界投射自己嘅偶像嘅正面形象（又係另一個粉絲透過自己嘅行動建構偶像形象嘅例子），再度增加號召力。

而我望返自己點解睇呢個 study with me stream 會有額外嘅動力，都係因着相似嘅原因：

我見到自己個推努力温書，同時鼓勵觀眾一齊温書；
以佢呢個行動建構我心目中作為「佢嘅 fans」嘅形象：佢嘅 fans 都係會努力讀書嘅；
從而令到我都有動力一齊温書。

似乎呢個模型，就可以解釋點解偶像可以有額外嘅號召力。

二、弔詭嘅偶像存在

雖然上面嘅模型幫到我去解釋點解人嘅行動會受偶像影響，但有一點係好弔詭嘅，就係個模型揭示偶像並唔係一個獨立個體，而係存在喺每個人心目中嘅一個形象。

每個人心目中嘅偶像形象，自然係基於每個人接觸到所有關於某個偶像嘅資訊（不論係嚟自官方定 fans）而建構而成。聽落冇問題，但係喺今日資訊咁豐富而且碎片化嘅時候，就令到每個人見到嘅偶像形象，未必同其他人嘅一樣，就好似瞎子摸象噉。

Photo by Wolfgang Hasselmann on Unsplash

例如如果我睇同一個 streamer，但凈係選擇去睇佢開台打機，我對佢嘅認知只會有佢好鍾意或者擅長玩咩遊戲，然後對我嘅影響就會係想一齊去玩嗰啲遊戲，或者投放多啲時間去玩嗰啲 game；但望著同一個 streamer，如果我凈係選擇去睇佢嘅 study with me stream，對佢嘅認知又可能會變成覺得佢係一個好勤力嘅人，對我嘅影響就可能係令我更加勤力讀書做嘢。當然呢啲只係兩個極端例子，但可以帶出嘅係，一個 fan 選擇去接觸乜嘢關於嗰個偶像嘅資訊，係直接影響嗰個 fan 心裏面對於嗰個偶像嘅形象，甚至乎每個 fan 都有一個獨特嘅偶像形象，一百個 fans 就有一百個對於嗰個偶像嘅形象。偶像唔再係一個客觀形象，而係一個主觀形象。由 fans 嘅選擇建立而成主觀形象。

（甚至有時呢啲形象會偏離偶像本身，譬如喺呢條 clip 度，個 streamer 就笑住噉投訴啲人凈係將佢玩得差嘅一面俾觀眾睇）

嚟到呢度，就見到一個循環：

第一，每個 fan 心目中對嘅偶像形象，係基於自己選擇點樣建構而成；
第二，呢個偶像形象會到頭來影響 fans 嘅行動。

換言之，影響 fans 自己行動嘅，雖然表象話係「偶像」影響 fans 嘅行動，但係實際控制 fans 嘅行動，其實係 fans 本身。但係透過 fans 自己構築一個屬於自己嘅偶像形象，就為自己行動增加動力。

呢個咁奇怪嘅現象，係咪凈係出現喺追偶像上面呢？非也，其實人一直都做緊呢樣嘢，而當中最為突出嘅就係宗教。

宗教嘅特質，講穿咗就係信徒以及宗教領袖建立一個神明，為神明附加故事，然後按其故事入面嘅特質行動。我哋都知宗教一定需要人去建立出嚟，例如牧師、主教、禪師、拉比等等嘅人去宣講佢哋嘅宗教教條，然後鼓勵信徒將佢哋嘅教導放喺心入面追隨。

但係呢啲宗教好少同你講佢哋係由人建構出嚟，而係借助神明把口去叫信徒噉做 [1]。一個例子就係基督教嘅 WWJD 運動，即係 What Would Jesus Do 嘅簡稱。呢個運動呼籲教徒喺做任何決定嘅時候都問自己 What Would Jesus Do，耶穌喺呢個情況下會做啲咩，先決定自己嘅行動。呢個就係典型嘅宗教行動模式：叫信徒喺心入面樹立一個形象，然後按其形象行事。表面上好似係呢個神明（in this case 耶穌）叫你去做一啲嘢，但係當你諗深一層，主導自己行動嘅，其實只係一個自己建構出嚟嘅角色，而唔係一個神明。宗教入面嘅所謂神明，只係一個幫自己去做一啲更好嘅決定嘅一個角色。

喺呢到就見到偶像同宗教之間嘅平行。其實兩者都係自己去建立一個理想嘅角色，然後用呢個自己建立出嚟嘅角色去影響自己嘅行動。宗教同偶像嘅力量，就係透過親手建立一個目標形象，然後為自己賦予「我係呢個目標形象嘅追隨者」呢個身份，從而有額外嘅動力改變自己嘅行動。講穿咗，其實兩者都係用自己改變自己，所謂「神明」或者「偶像」都只係一個虛構但有用嘅過渡角色。

三、製造自己嘅偶像

透過偶像同宗教嘅例子，我見到為自己建立一個偶像，係可以推動到自己去做一啲本身唔會去做嘅事。我就喺度諗，既然係噉，我可唔可以試吓為自己刻意噉製造一個偶像，然後推動自己去做一啲本身好難想象到自己會去做嘅事呢？

經過過去呢一年，我相信係可行嘅。呢個 blog 同網站，其實就係我去實行呢個構想嘅一個嘗試。我喺呢個網頁勾畫嘅，雖然全部都係事實，但係我亦都刻意凈係勾畫一啲我最想將自己 associate with 嘅一系列特質。我成為咗自己嘅雕刻家，透過網站嘅自我介紹同 blog，刻畫一個「理想嘅 Ryan Choy」嘅形象。（呢個形象有咩特質就自己參透啦）

而我日常生活亦都多咗諗呢個「理想嘅 Ryan Choy」會點樣做。尤其係工作時面對嘅家長，學生，以及 intern 入面嘅老細，interview 見嘅未來老細，都更加容易去將理想嘅 Ryan Choy 呢一面展現出嚟。而因着要求自己每個禮拜寫 blog，一個禮拜裏面亦都會不斷去問自己，呢個理想中嘅 Ryan Choy 今個禮拜會寫乜嘢，先符合佢嘅形象。當我不斷去重複呢啲行為以及諗法，我成功為自己構築一個屬於自己嘅偶像，亦令到自己更加貼近理想中嘅自己。

當然，即使喺心目中有咗呢個形象，唔代表我就會即刻成為咗呢個理想嘅 Ryan Choy。甚至乎我會話我其實永遠都唔會成為一個理想嘅自己，因為每行前一步，都會見到更加多屬於自己嘅可能性。同時我都有自己嘅軟弱，未必每個行動都同呢個理想中嘅自己睇齊（例如就嚟成年冇出片 lol）。但係有咗呢個形象，就可以藉助同偶像同宗教一樣嘅力量，推動自己行動。

製造自己嘅偶像，可能係一個頗為強力，但被低估嘅策略。We shall see.

[1] 一個比較特別嘅例子係佛教。釋迦牟利喺佛教入面都只係一個覺悟咗嘅人而唔係神，所以佛教 not exactly 係借神明把口去呼籲信徒行動。但係佛教嘅教導會同你講，佢哋係揭示呢個世界嘅本質（例如因果），然後都一樣係呼籲信徒改變自己，成佛，依然係有一個形象要求信徒作為目標前往。

一、偶像嘅號召力

二、弔詭嘅偶像存在

三、製造自己嘅偶像

具攻擊性嘅討論

強行應對緊張