強行應對緊張

我係一個好容易緊張嘅人，甚至乎到依家都係。

初中嘅時候，有次做 presentation 嘅經驗係幾深刻嘅。個 presentation topic 係咩已經唔記得咗，但係記得好清楚嘅係 present 之前超級緊張，打晒冷震，甚至乎同同學傾偈都做唔到。成個人凈係喺度諗個 presentation 會唔會畀人笑，有咩位會出錯。

但神奇嘅係，當我企出去開始講第一隻字之後，所有緊張嘅感覺都消失咗。當然唔緊張唔代表個 presentation 冇出錯，但係就係成個緊張嘅感覺唔見咗。冇打冷震，可以順暢噉講嘢。

當時嘅我好疑惑：點解可以喺行出去之前咁緊張，但係一開始咗成件事就唔再緊張呢？

而呢個感受亦都持續不斷發生：喺之後嘅所有 presentation，甚至乎到我近期嘅 job interview，都依然有呢個現象：越近正式出場嘅時候就越緊張，但係一開始咗之後就冇事。

我唔肯定點解會有呢個現象，但係我會估佢嘅原因係噉：

「緊張」嘅情緒之所以會出現，係源於人類嘅 fight or flight response: 喺有危機嘅時候，大腦會發出訊號推動自己離開嗰個環境，而「緊張」就係呢個訊號嘅體現。當人類進入現代社會之前，面對例如猛獸嘅危機需要有呢啲訊號驅動自己去逃跑，先能夠提升生存嘅機會，所以喺適者生存嘅規則底下，我哋都保持住有「緊張」呢個訊號嘅特質。

但係嚟到今日嘅現代社會，我哋唔會再喺日常生活到遇到啲咩有威脅嘅猛獸（動物園嘅唔計啦）。會認知做威脅嘅事物，就淨返類似 public speaking, 考試，比賽，見工等等嘅環境，而我哋嘅大腦亦都按住呢啲環境發出一個 fight or flight 嘅訊號，用一個「緊張」嘅感受提醒自己離開呢個環境。

換言之，所謂「緊張」或者係一個驅動自己逃跑嘅一個情緒訊號。當我未企上個台開始 present 嘅時候，大腦可能覺得自己有一個逃跑嘅選項：可能係匿入廁所扮唔舒服，甚至乎跑離課室等等；但係當自己認知到逃跑唔再係一個選項嘅時候，個感覺就自然消失，由 flight mode 跳返入 fight mode，就可以正常發揮。

自從我有呢個假設之後，就嘗試用一個 cognitive （認知？）嘅方向處理呢個緊張嘅問題。既然我緊張係源於個腦覺得有逃跑嘅選項，就説服自己逃跑唔係一個選項。個方法聽落無乜用，但係喺我身上有奇效：不斷喺腦入面重複同自己講「我點都要做呢個 interview」，有時甚至乎會講出聲。當我不斷向自己重複同喑示，自己就會慢慢認知到自己冇逃跑嘅選項，就唔再緊張。

甚至乎再極端啲，當自己有逃跑嘅選項嘅時候，就逼自己即刻開始做要做嘅事，就唔會緊張。例如以前拍片嘅時候，一開頭都好緊張，但係一開始咗 roll 機就唔會緊張。所以處理方法就係儘快 set 好部機開始錄影，然後就自然唔會緊張：因為個腦已經認知到自己再冇逃跑嘅選項。

當然呢個方法未必萬用，對某啲人嚟講甚至會有反效果，令到佢哋更加緊張。但係所謂嘅 cognitive therapy 都係做緊呢樣嘢。既然有人都做緊類似嘅嘢，why not?

製造偶像

點解 NYT 要收購 Wordle?