點解 NYT 要收購 Wordle?

紐約時報用過百萬美金收購填字遊戲 Wordle，點解？

首先約略介紹吓咩係 Wordle，本身有玩開嘅可以 skip~

Wordle 係一個類似 Mastermind 嘅填字遊戲，玩家需要喺六個機會入面估中一個 5 個字母嘅英文字。喺每估完一次之後，電腦就會話俾你知邊個字母喺答案入面出現而且啱位（綠色），邊個字母喺答案出現但係唔啱位（黃色），以及邊個字母冇喺答案出現（黑色）。玩家就需要按上面嘅提示，估出答案。

Wordle 嘅有趣之處，在於佢每日只有一題，而且全世界都係用同一個字做當日嘅問題，換言之每個玩家都可以同其他人同時比拼成績。與此同時，佢簡潔嘅版面以及容易分享成績嘅特性，令到佢輕易集合大量玩家，時至今日每日甚至有過百萬玩家每日上去玩呢個遊戲。

好多人入坑 Wordle 嘅原因，往往都係先見到 Social Media 有人喺度 post 一堆奇奇怪怪嘅格仔。第一次睇唔留意，第二三次見到覺得奇怪，第四五次見到就忍唔住喺 Google search Wordle，然後就每日入去玩了。當局外人見到每個人都喺度 post 一個自己睇唔明嘅語言嘅時候（Wordle 每日成績嗰啲格仔），為咗埋堆或者好奇心作祟，自然會去發掘佢到底係乜嚟，然後又 share 上 social media。當呢個雪球越滾越大，自然造就佢今日嘅成功。

講咗咁耐，噉點解 NYT 要收購 Wordle 先？我聽到呢個消息嘅第一反應，就係「吓，呢個遊戲點值過百萬美金呀？」但係 NYT 作為一間咁大嘅企業，應該唔會無端端送錢人洗嘅，所以就嘗試估吓 NYT 點樣 justify 呢個交易。

第一個可能嘅原因，就係覺得呢個遊戲有潛力，所以想收歸旗下。喺 NYT 嘅新聞稿入面，佢都講出咗呢點：NYT 近年致力透過文字遊戲吸引讀者，從而增加訂閲，而 Wordle 作為 NYT Games 嘅一分子將會係其中一個強而有力嘅武器。

The Times remains focused on becoming the essential subscription for every English-speaking person seeking to understand and engage with the world. New York Times Games are a key part of that strategy.

但係呢個原因本身顯然站唔住腳：如果想要有呢個遊戲，其實同 Wordle 創辦人傾個 licence 翻嚟咪得囉？點解要成個遊戲買咗佢，然後仲要將個平台移師過去 NYT 個網站？如果凈係想要有呢個遊戲， NYT 係唔需要大費周章洗成百萬美金買個遊戲翻嚟。NYT 要買 Wordle，必須有佢作為一個「遊戲」以外嘅原因。

第二個可能嘅原因，就係 Wordle 嘅用户羣。按 NYT 嘅新聞稿，Wordle 每日有上百萬嘅玩家，如果單純傾咗個 licence 翻嚟，本身嘅 Wordle 玩家係唔會過檔去 NYT 版本嘅 Wordle 去玩，亦都唔會吸引到本身嘅 Wordle 玩家訂閲 NYT 嘅服務。尤其係 Worlde 個版面本身咁簡潔而且冇廣告，即使 NYT 買到個 licence，啲人又點會轉過去玩呢？吸引用户羣到 NYT 嘅平台，就似乎係一個可能嘅原因。

但係呢個原因又足唔足夠 justify 一個過百萬嘅價錢呢？按照新聞稿，Wordle 將會繼續係一個免費遊戲，而且玩法唔會改變。當然，NYT 絕對可以透過佢哋平台吸引玩家訂閲佢哋嘅 NYT Games 服務去賺返盤數，但以一個一年 25 美金嘅訂閲費，加上 Wordle 繼續係免費嘅前設底下，又有幾多人會因為平台轉移而訂閲 NYT Games 嘅文字遊戲？尤其係呢啲短期網絡熱話，過咗三四個月斷估唔會仲有咁多人玩。即使有，都唔似肯無端端畀錢玩一個免費遊戲啦。單純為咗吸引用户羣以增加訂閲收入，似乎依然唔足以 justify 過百萬嘅價錢牌。

當然，NYT 絕對可以加插廣告或者 paywall，嘗試增加收入。但係一個咁簡單嘅遊戲，如果 NYT 一整 Paywall 肯定有人會整返個免費版本。到頭來 NYT 分分鐘偷雞不成蝕把米，流失更多用户。所以吸引用户羣訂閲本身，亦都唔足以 justify NYT 需要購買 Wordle 嘅原因。

最後一個我覺得比較有可能嘅原因，就係 Wordle 已有嘅玩家數據。正如 NYT 新聞稿所講，佢哋想透過文字遊戲去吸引更多嘅訂閲者，所以佢哋其中一個目標，就係提升佢哋嘅文字遊戲嘅玩家黏性，令到玩家每日都記得入去玩，從而繼續訂閲。

Wordle 作為一個有過百萬每日玩家嘅遊戲，手頭上有大量玩家表現嘅數據，容許佢哋做好多唔同嘅分析。例如係難嘅字定容易嘅字先吸引到玩家第二日繼續玩？如果連續幾日嘅詞語係容易嘅時候，會唔會因為難度太低而流失玩家？呢啲種種可以用嚟改良 NYT 已有文字遊戲嘅數據，我認為反而係收購 Wordle 嘅最大收穫。呢啲數據唔可以單以一個 licence 獲得，而必須透過收購 Wordle 先可以全盤獲取。

Wordle 係一隻識生金蛋嘅雞，NYT 亦都知道如果佢哋加插 Paywall 或者太多廣告，就會殺死呢隻雞。所以收購 Wordle 呢個行動唔似係想直接透過佢轉化成為訂閲。反而將 Wordle 保持免費，作為一個生招牌吸引玩家進入 NYT 嘅網站，同時透過 Wordle 已有嘅玩家數據改良 NYT 嘅文字遊戲，先足以 justify Wordle 過百萬美金嘅價錢。

點解 NYT 要收購 Wordle?

強行應對緊張

思想犯罪