思想犯罪
以前返教會，啲導師係噉樣描述「思想犯罪」嘅：
Photo by Aaron Burden on Unsplash
「嗱，基督教嘅罪唔限於作惡，如果你想去做一啲唔啱嘅嘢，喺基督教嚟講都可以係犯罪㗎！」
喺我講落去之前，都戴返個頭盔先：呢個只係我回憶入面導師講嘅嘢，並唔代表呢個等於基督教嘅教義；而無論呢個係咪基督教嘅教義一部分，都唔影響呢個 blog 嘅討論。
Photo by Keegan Houser on Unsplash
噉我作為一個麻煩嘅學生，就問導師：
「噉我點樣先算『想』去做一啲唔啱嘅嘢？如果純粹意識到有作惡呢個選項，又算唔算犯罪？但係我控制唔到呢個諗法嘅出現㗎喎！」
個討論點樣進行落去我就唔記得咗，不過可以肯定嘅係導師俾唔到我一個有説服力嘅答案，而呢個問題都纏繞咗我好一陣。
Photo by Mylon Ollila on Unsplash
個問題重點係在於我發現其實自己控制唔到我去諗啲乜。一個相關而且幾有趣嘅實驗就係叫 “Do not think of a pink elephant”，就係叫實驗參與者可以喺腦入面諗任何嘢，但唯獨是唔可以諗到一隻粉紅色嘅大笨象。
如果大家有興趣都可以試吓呢個實驗：用一分鐘時間俾個腦周圍遊蕩，諗乜都得，唯獨是唔可以諗一隻粉紅色嘅大笨象，睇下你可唔可以成功一分鐘完全唔會諗到佢。
而如果你同我以及其他實驗參與者一樣，就會發現無論自己諗啲乜，隻粉紅色大笨象都會無端端出現。當然，心理學對於呢個現象有佢嘅解釋，但係我對呢個實驗嘅理解，就係原來其實我自己其實無乜能力控制自己嘅思想甚至乎情感。我嘅思想以及情感出現就出現，唔係「我叫佢出現所以出現」，而係佢自發地 (spontaneously) 出現，而我根本冇能力控制佢嘅出現 —— 就好似發夢噉，通常都控制唔到夢境會出現啲乜，亦控制唔到我喺夢境入面嘅行動。
觀乎我嘅思想以及感受點樣影響我嘅一日，我發現其實我經常都被呢啲自動出現嘅思想以及感受牽住走，甚至乎好似不受控噉。我感受到肚餓，所以去搵嘢食；見到個 notification，就撳入去睇。情感同思想自動嘅出現，喺大部分嘅時間掌管咗我嘅行動。
用呢個角度去回應所謂「思想犯罪」嘅問題，就顯然見到點解「思想犯罪」條線好難畫。一啲諗法嘅出現，未必吓吓係由自己所控制所發生，反而係佢自己出現。所以用思想去判罪就顯得唔合理 —— 我都控制唔到有咩思想出現喺我腦海，我又點樣可以為佢承擔責任呢？
而呢個睇法就引申到去「我」同「我嘅思想」之間嘅關係。由於我控制唔到我嘅思想，某程度上其實我同出現喺我腦海嘅思想並唔係一個相同嘅個體。用靜觀嘅方向去睇呢個關係，我係可以同思想以及感受分割開，以一個旁觀者嘅角度客觀觀察情感同思想自發出現嘅現象。
Photo by Sergey Semin on Unsplash
而運用呢個模型去觀察情感以及思想，就發現其實佢哋嘅消逝同佢哋嘅出現係可以一樣咁突然。隨住我去觀察情感以及思想本身，而唔係畀佢牽引我嘅行動，佢哋往往會自己消失。由於我同我嘅思想並唔係一個相同嘅個體，其實我係有能力唔去遵從情感驅使我嘅行動。
然而要將思想情感本身同自己分離，需要先意識到「自己」並唔等同出現喺腦海嘅思想，以及隨機出現嘅情感。而呢個就係基督教嘅導師冇同我講嘅事，甚至乎係我覺得基督教唔夠重視嘅一啲教導。倘若當時嘅導師可以用呢個模型去解構思想犯罪嘅問題，其實個答案顯而易見：思想嘅出現本身並唔係犯罪，唯獨是選擇將自己嘅思想浸淫喺諗法入面，容許思想任意引領自己，先係問題所在。而要解決呢個問題，先要認知「我」係可以同腦海嘅思想分離，以及作出觀察。
