盡力又如何？
失敗嘅時候，啲人好鍾意問一個問題：噉你有冇盡力先？
呢條問題其實都幾 bug，因為通常一問完，其實總會搵到一啲 turns out 可以做多啲、做好啲嘅決定。但係為咗好落台，都會覆返句：都有盡力嘅。喺失敗之後進行呢啲對話，以及佢帶嚟嘅感覺，經常都令我好唔舒服。
唔舒服個位，一嚟係因為話自己有盡力呢句，好多時都唔係事實嘅全部；二嚟，即使答完都唔會知下次可以點樣做好啲。好多時呢啲迷茫就係源於冇清楚了解「盡力」到底係乜。
Photo by Duangphorn Wiriya on Unsplash
簡單啲噉睇，只要我唔會想翻番去之前，更改做過嘅決定，就可以話係「盡咗力」。但係呢個定義個問題，在於經常引致事後孔明嘅問題。好多時當知道結果之後望返轉頭，就會用個結果嚟判斷返以前嘅行動。正所謂「有早知，冇乞衣」，用馬後炮嘅角度睇之前嘅決定，其實無乜意思。
正路啲嘅睇法，都只係將上面嘅方法改少少。與其用事後孔明嘅角度去睇，可以問返自己「用返當時嘅資源，會唔會做相同嘅決定」。如果個答案係會的話，我覺得其實就可以話係盡咗力。呢個方向一方面可以避開事後孔明嘅問題，另一方面亦都可以幫自己反省有咩決定係有能力做好啲，而當時冇做到。用呢個角度去做反省，就相對容易啲喺下次面對類似問題嘅時候，唔犯相同嘅錯。
上面都係啲傳統對於「盡力」嘅分析。喺我應用呢個角度嘅時候，都覺得好合理，但係實行嘅時候，尤其係重複實行嘅時候，反而會遇到一啲問題。個問題唔係在於個方向本身，而係在於我個人應用。
Photo by Aron Visuals on Unsplash
當應用呢個角度去反省自己有咩可以做好啲嘅時候，好多時個答案都係的確有啲決定係可以做好啲，而自己冇做到。然後就會同自己講：「係囉如果我做好啲（盡咗力），我咪唔會失敗囉～」
然而當呢個模式重複咗幾次，就會越嚟越傾向同自己講自己冇盡力，而且如果盡咗力就會成功。當噉樣落去嘅時候，我發現自己甚至會喺處理問題嘅時候偷懶，甚至某啲位我知可以做好啲都唔做。為嘅，就係希望喺所謂「反省」嘅時候搵到自己冇盡力嘅位，等我可以同自己講「如果我自己盡咗力就會成功」。
Photo by Tine Ivanič on Unsplash
呢個誘惑係大嘅，而我都曾經陷咗喺呢個坑入面。與其發現自己「盡咗力都失敗」，令自己相信「我做好啲就會成功」其實更吸引。承認自己冇能力成功係一件好痛苦嘅事，反而令自己相信「我做好啲就會成功」更容易，而且更舒服。
至於要點應付呢個誘惑，恕我冇一個好好嘅答案。但係我覺得之所以會受到呢個誘惑引誘，無非係兩個原因：第一，就係個「成功」本身唔夠吸引；第二，就係個「失敗」嘅懲罰唔夠痛苦。如果成功做到一件事嘅收穫係足夠吸引嘅，自然會盡力去做；同樣地，失敗嘅懲罰係足夠痛苦嘅話，我都唔會想活喺一個「冇盡力但係我本身可以成功」嘅世界入面。
而呢啲都牽涉喺做事嘅心態。只要目標明確，令自己覺得自己真係好想達成某個目標，「成功」本身就會更吸引，而自己亦會更加唔想「失敗」。呢啲都係一啲好個人，好 internal 嘅改變，但唯獨係靠內在嘅心態調整，先可以解決到呢個誘惑。
