如何有效地批評人
我批評人哋之前，都會問自己呢三個問題：
Photo by Emily Morter on Unsplash
有冇需要批評？
有冇需要依家批評？
有冇需要由我嚟批評？
自從用咗呢三個問題過濾我嘅批評，我自己覺得我同人溝通稍為容易咗啲，而當真係批評嘅時候亦都顯得更加有效。
Photo by Diana Polekhina on Unsplash
先講第一條問題，有冇需要批評。
我觀察自己想批評人哋嘅時候，往往發現其實我唔係真係有嘢想批評，有時係純粹貪過癮想搵嘢踩吓人哋。踩人就梗係過癮啦，但係呢類型嘅批評往往對於同其他人嘅溝通無乜正面效益，長遠嚟講都建立唔到同人嘅關係。呢啲冇必要嘅批評，可以透過呢條問題儘量避免。
但係乜嘢係需要批評㗎呢？我覺得作為一條底線，同自己價值觀有衝突嘅觀點其實就已經有條件值得批評。同自己價值觀有衝突呢點就可以過濾嗰啲為咗過癮而做嘅批評：為咗過癮嘅批評好多時都係想搵啲嘢嚟同人拗，而搵嘢嚟拗，咪即係一啲本身自己都會同意嘅嘢（i.e. 同自己價值觀相符嘅觀點），夾硬唔同意佢囉。所以作為底線，同自己價值觀有衝突嘅觀點，先至係值得批評。
但係顯然呢條問題唔足以過濾所有批評。好多時候批評都要睇場合同身份，甚至乎方法。要考慮埋呢幾點，就要問埋第二第三條問題。
Photo by Icons8 Team on Unsplash
第二條問題，就係有冇需要依家批評。
好多時候批評係嚟得好快。甚至乎人哋講都未講完，自己就已經想即刻駁佢哋。我都經常有呢個反射動作，但係呢個反應其實唔太健康。先講咗明顯嘅問題，就係如果培養咗吓吓都即刻批評嘅習慣，就會慣咗唔去理解人哋嘅論點就去作出批評。當經常噉做嘅時候，我自己嘅批評往往都會 miss 咗人哋個核心論點，導致討論越行越遠。多啲問自己有冇需要即刻批評，就可以避免呢個情況。
而呢條問題嘅另一個作用，就係可以幫我自己辨析場合。有時其他人講啲嘢，其實目的唔係去搵啲「啱」嘅嘢，純粹係想搵人去認同或者理解佢。人哋講嘅嘢可能顯然有錯，或者同自己嘅價值觀相衝，而自己想去批評佢嘅誘惑亦都好大。但係未必喺每個類似嘅情況都適合即刻批評佢哋。
Photo by JESHOOTS.COM on Unsplash
例如如果有個朋友返完工話老細點點點，同事點點點，佢通常都唔係想問乜嘢係「啱」定「錯」，佢都係想搵個人認同佢啫。喺呢啲情況，「有冇需要依家批評」呢條問題就可以幫我分辨個情況，到底個朋友係想搵「啱」定「錯」，抑或純粹係搵人認同佢。
通常問完自己呢條問題，我去批評人哋嘅情況又少咗好多。如果真係想回應佢，或者搵另一個機會先同佢講返囉。
去到第三條問題，有冇需要由我嚟批評，就牽涉少少對於自己身份嘅認知。
先講一個簡單嘅例子。返工嘅時候見到老細有嘢唔啱，你都唔會直接話佢錯啦，係咪？通常嘅做法都係話佢喺咩方面啱，之後先講喺另一個方面自己點睇。點解會噉做？咪因為自己知道自己嘅身份並唔適合直接噉批評。
同樣道理，其實喺好多環境入面，都冇需要由自己去進行批評，甚至乎如果自己去批評反而會有反效果。當一個人受到批評嘅時候，其實好容易進入一個 defensive 嘅狀態（類似一個自衞嘅模式？）。喺呢個狀態下，無論個批評係幾合理，個人對於批評係完全唔會聽得入耳，而係會盡全力搵原因反駁對方。要令到個批評有效，先決條件係對方信任自己，所以先有「有冇需要由我嚟批評」呢個問題去 filter 批評。
Photo by krakenimages on Unsplash
批評好易，但係有效噉批評好難。上面呢三條問題，極其量其實都只係過濾大部分唔值得作出嘅批評。我就覺得過到呢三條問題嘅批評，其實都已經頗有效，但係點樣傳遞同點樣令到對方接收到個批評，就係完全另一個更加困難嘅題目。我自己都仲係喺學緊點樣批評嘅過程度，希望呢篇 blog 可以作為少少嘅參考。
