用放棄換取堅持
堅持係一件好難嘅事。而佢難嘅原因，往往係因為忽視「放棄堅持」嘅重要性。
Photo by Glenn Carstens-Peters on Unsplash
我有好多嘢都想堅持做落去。可能係每個禮拜寫blog，維持一個身份，堅持做自己覺得啱嘅事。但係喺堅持做一件事嘅路上面，往往有好多誘惑：「今個禮拜好攰，不如唔好寫啦」；「堅持行落去會畀人笑㗎喎，不如放棄啦」；「做呢樣嘢一啲進展都冇，不如唔好做啦」。要點樣做先可以對抗呢啲誘惑？
直觀嘅答案就係只要個目標夠清晰，就容易堅持。例如我寫 blog 噉，我只要有一個定義得好清晰嘅目標，就會容易啲跟住呢個目標嚟做。呢個都係所謂嘅 SMART goal 模式：
By Dungdm93 on Wikimedia Commons
Specific - 用自己嘅網站寫 blog
Measurable - 每個禮拜日要出至少一篇 blog
Attainable - 每個禮拜寫啲嘢其實唔難 (weird flex but ok)
Relevant - 幫人連結知識同生活，係一件我覺得重要嘅事
Time Based - 用禮拜為單位確保進度
傳統智慧就會話，只要目標係跟住呢個 SMART goal 去定，就容易堅持做落去。由於目標清晰而且可以一步一步噉跟住嚟做，要推動自己去堅持做一件事就比起一個虛無縹緲嘅目標容易啲堅持行落去。
而我自己都推崇呢個 SMART approach。呢個流傳咗幾十年嘅方法，咁多人都繼續用緊自然有佢嘅效果。除咗喺寫 blog 上面，我喺讀書温書上面都有應用，亦都幾見效。
Photo by Annie Spratt on Unsplash
問題就係雖然佢見效，但係噉樣積落嚟要做嘅嘢會越嚟越多。當用呢個方法去到一個位就會麻木咗：每日都有一堆嘢要做，而因為 SMART goal 嘅特性，我要跟住去做每樣嘢其實好容易。而由於每個目標都係用 SMART goal 模式設定，變咗每個 task 睇落嘅重要性都好似差唔多。
但由於每個 task 重要性都差唔多，當我有一日唔好彩完全失去動力嘅時候，就會所有 task 都冇動力去做。SMART goal 係一把雙刃劍，啓動佢好容易，但係當有一日 overload 咗嘅時候，就會令到成個工作嘅 system 崩潰。
Photo by Nubelson Fernandes on Unsplash
呢個模式 bug 嘅原因，就係因為每個 task 都咁容易，手頭上嘅 task 就失去咗屬於佢哋嘅迫切性同重要性。堅持每個禮拜睇 reading，可能就變咗同堅持每日 login 做日任一樣咁重要。要維持住堅持做重要嘅事情嘅動力，就要識放棄堅持。
我自己對於幾時放棄有兩個準則。當下面兩個準則同時達到，我就會選擇放棄做嗰件事
第一，就係我做嗰件事之前係好唔情願噉做嘅；
第二，就係我做完嗰件事之後唔感激自己堅持做咗落去。
例如寫 blog，其實每個禮拜日打開部電腦打字嘅時候都有啲唔情願，唔係幾想打。但係每次打完睇返，雖然未必寫得好好，但係都會多謝自己寫咗出嚟。
不過掉轉嚟講，有時開某啲好耐冇認真玩嘅 game 做日任都覺得好唔情願，然後攞完石之後又唔覺得好大成功感。由於呢兩個準則同時達到，我就會考慮唔繼續每日 login。
同樣，當我實驗緊某啲讀書方法嘅時候，我都係透過呢個模式選擇放棄。例如之前會由頭到尾睇啲 Law Case 或者本 Textbook，做嘅時候又辛苦，之後又唔覺得睇完會多謝自己睇咗，就可以好輕鬆噉放棄而又一啲罪疚感都冇。
Photo by Jackson Simmer on Unsplash
透過揾到放棄嘅方法，剩番落嚟堅持做落去嘅嘢，先係真正值得堅持做落去。堅持同放棄其實係一銀兩面，凈係識堅持其實冇意思，反而會失去真正值得堅持，同無咁重要嘅嘢之間嘅分別。當我堅持去做一件事，我可以同自己講：「我堅持做落去，係因為我想做」或者「我堅持做落去，係因為我做完會多謝自己」，而唔係純粹成為一個凈係識跟 SMART goal 行嘅奴隸，亦都更加容易保持動力。
透過明確定義乜嘢係需要放棄，先可以揾返堅持嘅理由同價值。
