成為「理想中那個自我」——回望《守護蛋精靈》
之前碌 Twitter 見到有人畫日奈森亞夢。估唔到嚟到 2021 年都仲會有人畫《守護蛋精靈》嘅畫，有少少感動。
呢齣卡通好大程度影響咗我成為一個點嘅人，至少影響咗我點樣去理解自己。齣卡通嘅設定係每個人都有一個「理想中」嘅形象，而呢個形象會透過「守護甜心」（類似精靈嘅物體？）體現出嚟。故事就係講各個角色喺「現實中嘅自己」同「理想中嘅自己」中間嘅拉扯同衝突，以及互相推進成為理想中嘅自己。
心水清嘅就會知點解無端端會寫呢齣卡通：無錯，其實今日嘅 blog 就係上個禮拜嘅延續。尋找理想中嘅自己，以及點樣定義自己嘅身份呢啲嘅諗法一直係我寫 blog 嘅時候諗緊嘅問題，而《守護蛋精靈》就係第一個將呢個問題呈現俾我嘅作品。
當然，我第一次睇嘅時候凈係得三年班，根本唔會有好似今日噉嘅諗法。純粹係依家諗返，就發現關於呢啲問題嘅種子，一早已經種咗喺度。
入正題。上個禮拜講到要去爭取自由意志，或者令到「自己」屬於自己而唔係單純受到外界因素影響，其中一步就係要比較「現實中嘅自己」同埋「理想中嘅自己」。不過到底要點比較現實同理想中嘅自己？甚至乎要點樣揾理想中嘅自己？
呢個就正正係《守護蛋精靈》入面描述嘅狀況：卡通入面嘅角色有佢哋嘅現實考量，而「守護甜心」就代表一個喺冇限制嘅世界入面嘅「理想中嘅自己」。角色透過將自己同「守護甜心」比較，對談，慢慢前進成為一個可以喺現實存在，又更加接近理想嘅自己。
而我相信，呢個就係成為理想中嘅自己嘅方法。卡通入面嘅角色比較好彩嘅，就係佢哋「理想中嘅自己」嘅形象，透過「守護甜心」可以完整噉呈現出嚟，唔需要角色自己尋找。但係現實並無「守護甜心」。（ok 我承認我都有幻想過，不過都好正常啫？）要建構「理想中嘅自己」，都係要透過努力先做到。
我之前見過有幾個練習係幾適合用嚟尋找「理想中嘅自己」。可以試吓問自己呢啲問題：
1. 百年歸老之後喺你嘅墓碑上，你想人哋用咩詞語嚟描述你？
2. 喺最理想嘅情況下，5 / 10 / 20 年後嘅你做緊啲咩？
3. 如果你知道你可以喺唔失去任何資源嘅前提下嘗試做一件事，你會做乜？
其實呢啲就係內觀類型嘅練習。透過問自己呢啲問題，就可以構築到一個「理想中嘅自己」。
第一條問題嘅目的，就係想問對於自己嘅生命嚟講，乜嘢係最重要嘅事。對於我嚟講，我會想被記得為一個重視家人同朋友關係、擅長解決問題、能夠啓發思考、不斷學習嘅人。
至於第二條問題，就係想問自己喺理想中嘅情況，會喺咩時候達成咩目標；而第三條就係問有啲乜嘢係自己真係好想做到嘅。對於我嚟講，就係做到一個有人睇嘅 content creator。（好遙遠啊）
透過上面嘅練習，就應該會建構到一個「理想中嘅自己」，或者至少有少少「理想中嘅自己」嘅外形。當見到一個噉嘅自己嘅時候，就可以問下點解「現實中嘅自己」唔係「理想中嘅自己」。啲限制係咪一啲外在嘅限制，抑或內在嘅限制？如果係一啲外在嘅限制，又改唔改變到呢？
我大概喺一年前左右問咗自己呢啲問題，就發現其實想做 content creator 嘅限制並唔係一個外在嘅限制，而係一個內在嘅限制。老土都要講句：千里之行，始於足下。我相信睇到呢篇 blog 嘅都係一啲相對有條件啲嘅人，想做到一件事嘅限制，好少係一啲例子外界嘅限制，反而係因為自己冇開始去行第一步。
透過建構理想中嘅自己，然後再將現實中嘅自己推往嗰個方向，其實就係令到「自己」屬於自己，獲得自由意志嘅方法。唔去噉做嘅時候，行動往往會單憑外界定義操控，而「自己」根本唔屬於自己，而屬於世界。
十幾年前嘅我想呢個世界存在「守護甜心」，係因為我想有卡通入面角色嘅能力；今日嘅我都依然想，不過原因成為我想確切噉見到我「理想中嘅自己」係一個點嘅人，而我又可以點樣前行成為佢。
理想中那個自我 強勢又英氣
就算世界 每一個都說了不起
心中知我根本不算太詭秘 是普通到 未配給重賞讚美
兜咗咁大個圈，都仲未講《守護蛋精靈》點樣影響我成為一個噉嘅人。上面講嘅內觀同建構自己，顯然係一啲「今日嘅我」嘅諗法，不過「十幾年前」嘅我都有受到齣卡通影響，而個影響我依家諗翻都覺得幾有趣。
In case 有人仲未發現到，其實《守護蛋精靈》係一個少女漫畫改編嘅女性向動畫。當時嘅我一方面好投入噉睇，另一方面亦好似覺得自己「唔應該」睇呢啲卡通。甚至乎當屋企人早返嘅時候，我會好快轉台扮唔係睇緊《守護蛋精靈》；而翻學嘅時候亦都唔會好似其他卡通噉，主動同同學提起以及一齊傾。
而呢個就係我第一次遇上「身份」同「自我」之間嘅掙扎。巧合嘅係，其實齣卡通都係講緊一模一樣嘅嘢，只不過我當年未意識到。當年嘅我遇到呢個掙扎嘅時候，因為唔識去處理亦都冇人可以去傾，所以選擇咗逃避並且維持住「典型男仔」嘅身份。
雖然呢件事一直留喺我心入面冇同人講，但係我亦都第一次因為呢件事而感受到「性別身份」係一個可以限制「自我」嘅存在。當時仲讀緊小學嘅我開始問得更加多關於呢啲身份嘅問題，例如點解女仔會扮公主而男仔唔會扮王子。而隨住我問呢啲挑戰點解性別會定義行動嘅時候，就推動到今日嘅我更加留意關於平權嘅問題。
所以，《守護蛋精靈》對我嚟講可以話係一個啓蒙作。佢一方面喺現實層面上，為我揭露「身份」同「自我」之間可以有衝突；另一方面，卡通入面嘅訊息亦都展現咗成為理想中嘅自己嘅方法，以及路途中會遇到嘅挑戰。《守護蛋精靈》係一齣好有趣，而且繼續影響緊我嘅卡通。
後記
「身份」同「自我」之間嘅掙扎呢個題材之所以經常出現喺我嘅 blog，原因係我多次遇到呢個問題。鍾意睇《守護蛋精靈》同「典型男仔」呢個衝突，係我第一次遇見呢個問題。而喺我初中同高中時期分別亦都遇到一次「身份」同「自我」之間嘅衝突，而佢哋對我嘅影響不亞於上面講嘅經歷。兩個都係我計劃終有一日會寫喺呢個 blog 嘅故事，不過就未必短期內會寫嘞。
