冥想一年後嘅反思
今日想分享一下 Meditation，中文裏面聽得多嘅譯法就係靜觀或者冥想。
我自己做 Meditation 大概有一年左右。起因主要係因為我見到唔同嘅地方都有講佢嘅好處，包括 HKU send 出嚟嘅 email，我睇開嘅 YouTuber 甚至睇嘅書都有建議多啲做 Meditation。見有咁多人都話做 Meditation 好，我就俾個機會自己試一試佢。
咩係 Meditation
喺做 Meditation 之前，我一直覺得佢係一啲好「玄」嘅嘢嚟。尤其係其中一個譯法係將佢譯為冥想，而呢個字又經常同一啲宗教甚至神怪嘢有關連，我係頗抗拒嘅。不過隨住冥想有越嚟越多嘅科學實驗支持佢對身體有益，啲書甚至話佢可以幫助自己喺唔同方面有更好嘅表現，可以幫助睡眠，減低壓力，我亦都慢慢放低對佢嘅偏見，認識咩係 Meditation。
講咗咁耐，到底咩係 Meditation？我自己就覺得「靜觀」呢個翻譯幾簡潔噉涵蓋咗 Meditation 嘅本質。用個「觀」字嚟講，其實 Meditation 嘅本質就係觀察 —— 不過唔係觀察外在嘅環境、物質，而係觀察自己嘅意識。平時講嘅觀察經常係一個指向外界嘅動作，觀察「出面」有啲咩，發生緊咩事；但係指向內嘅觀察，觀察自己諗咩就反而好少會做。所以「靜觀」入面嘅「觀」，就係觀察自己意識嘅浮現同消失。至於「靜觀」入面嘅「靜」，就係指內在，觀察自己嘅意識嘅時候嘅狀態係「靜」而唔係「動」嘅。佢唔係話要咩都唔諗，反而係要明確噉意識到自己嘅意識流動，靜靜噉觀察，而且唔帶判斷噉觀察自己嘅意識，亦唔主動沉醉喺思考當中。所以「靜觀」呢個翻譯，我自己覺得的確係頗準確噉描述咗 Meditation 係做緊啲乜。
我感受嘅 Meditation
不過即使用上面嘅描述去講 Meditation 係啲乜，對於一個冇體驗過嘅人可能都仲係有啲玄。我自己嚟講， Meditate 嘅時候其實就係字面上嘅「觀察自己個腦有咩思想浮現」。我 Meditate 嘅時候，發現其實有咩思想浮現根本唔到我控制 —— 有時突然之間會諗起小學啲嘢，又或者無端端擔心未來嘅事。思想嘅出現唔到我控制，但係我喺 Meditation 嘅過程，發現到嘅係沉唔沉醉喺呢啲諗法上面，其實係我可以控制嘅事。而點樣可以好精確噉凈係觀察有啲咩思想浮現，但係又唔沉醉喺諗嗰件事上面，就係 Meditation 對我嘅訓練。
至於我可唔可以真係令到自己唔去沉醉喺某個喺意識入面浮現嘅思想，好老實講，真係唔係次次得。但係每次發現自己沉醉喺某個思想入面，都係一個訓練自己嘅機會。透過不斷留意到自己嘅意識發生緊咩事，我呢一刻所謂「諗緊」嘅嘢又係唔係我真係「想」諗嘅嘢，就係 Meditation 能夠帶俾我，能夠應用喺生活嘅訓練。
而能夠明確噉留意到所謂情感只係其中一個喺意識入面浮現嘅思想，就幫到我自己嘅心理健康好多。其中一個例子係當自己好嬲或者好唔開心嘅時候，當我能夠留意到「我自己呢一刻感受緊嘅情感係『唔開心』」，我就發現所謂「唔開心」呢個情感其實好快消散。套用我用緊嘅 Meditation App "Waking Up" 嘅創作者 Sam Harris 嘅講法，當熟習咗 Meditation 之後，好容易發現自己嘅情感，無論係開心嘅抑或唔開心嘅，佢哋嘅 Half Life 都係非常之短。Meditation 幫到我嘅唔係可以控制自己嘅情感，不過佢能夠幫我留意到我所感受到嘅情感背後嘅本質，只係其中一種思想。
誇張啲噉講，我會話 Meditation 令到我更加似一個忠實嘅自己，而唔係一個隨住直覺做嘢嘅人。當我沉醉喺一個思想上面（用 Sam Harris 嘅 Term 嚟講就係 "lost in thought"），我諗嘅嘢根本唔係我自己控制緊嘅。當我 lost in thought 嘅時候，我只係被出現喺我意識入面嘅思想扯住嚟行，而我並唔能夠對佢做啲咩。但係經歷過 Meditation 嘅訓練之後，我可以更加清楚噉認知到邊啲思想係我「選擇」去作出，而邊啲思想係我隨住個 flow 而作出。而透過呢啲不斷嘅反省，就令到我成為一個更加忠實嘅版本嘅自己。
然而呢啲只係我對 Meditation 嘅體會。喺我睇嘅唔同嘅書以及唔同嘅 YouTuber 嘅片入面，每個人對於 Meditation 嘅體會都未必一樣。然而所有人嘅共通點都係透過 Meditation，每個人到可以更加清楚噉認識到自己嘅意識本身，從而更加認識自己。配合 Meditation 嘅其他附帶好處，包括改善睡眠質素，幫自己更容易專心等等，我係推薦每個人都至少試一試。坊間有唔少 app 有 guided meditation，Waking Up 亦有免費選項，大家可以試試。
Cheers,
Ryan
