用實力操控運氣

唯有把細節做到完美，把失誤降到最低，才有資格提到「運氣」這兩個字。——Tom60229

可能係因為我曾經幾鍾意爐石呢個遊戲，我都有頗多機會去反思運氣呢樣嘢嘅性質，以及佢點樣影響我自己去評價唔同嘅結果。

從表面嚟睇，運氣其實可以好簡單噉去歸納為一啲「我控制唔到嘅嘢」，而相對而言，「實力」就係一啲我控制到嘅事情。而我覺得睇運氣呢個概念，主要有兩種合理嘅提法。

第一種睇法就係正如爐石世界冠軍 Tom 所講，唯有將所有細節，即係自己控制到嘅嘢，做到完美，先有資格講「運氣」呢兩個字。當然，喺爐石呢種又要抽卡又有大量隨機系統嘅卡game嚟講，一波嘅 highroll 的確係可以斷定一場 game 嘅勝負。但係倘若作為一個玩家，冇盡自己最大能力去推高自己嘅勝率，又可以憑乜嘢投訴自己因為運氣而輸？掉轉嚟睇，見到一個玩家冇做啲 maximise 自己勝率嘅嘢都贏到，我作為觀眾都唔會滿意啦。所以我好同意 Tom 所講，唯有將細節做到完美，先有資格講運氣。

而第二種睇法可以話係用另一個角度表達 Tom 所講嘅嘢。運氣講穿咗其實就係一個 variance，有正有負，可以喺一個範圍入面影響到我嘅表現。而與此相對嘅就係自己嘅實力，而實力嘅 level 就決定咗運氣可以影響嘅 range 有幾高有幾低。如果本身實力夠高嘅，點 lowroll 都有個譜；而本身實力好低嘅，俾盡所有運氣都唔會夠數。所以一個實力夠高嘅人，即使佢不斷噉 lowroll，只要佢嘅 lowroll 唔足以蓋過佢同對手嘅實力差距，噉對手無論幾好彩都冇用。實力足夠嘅人幾時都會贏。我自己覺得呢種睇法幾有説服力。例如考試，的確有時會有啲改卷嘅人改到我會差少少先到下一個 grade，但係如果我有足夠嘅實力，令到個 marker 無論點改都唔會令到我跌 grade，噉咪冇問題囉。

所以到頭來，其實好多時候話自己「唔好彩」嘅人，包括以前嘅我，其實都忽視咗自己實力或者自己嘅準備嘅重要性。無錯，可能我某次有差嘅結果，的確係因為一啲唔好彩嘅事件而令到一個我本身有98% 機會成功嘅 case 失敗。但係點解我會容許嗰 2% 嘅失敗情況出現？點解我唔可以將佢壓得更低，甚至令佢消失？將呢個結果瀨去運氣可能係一個令我更加舒服嘅心態，但係唔係一個能夠令我進步嘅方法。我繼續噉行落去，平均每 50 次就會有一次失敗，而我絕對有方法令到我失敗嘅機會更低。

極端啲講，其實容許自己有失敗嘅機會，就好似賭博噉樣。每當我放棄提升自己嘅實力而繼續容許失敗嘅機會出現，我就好似買緊大細噉。無錯，我可能有 98% 成功，但係亦都有 2% 失敗。而當呢 2% 失敗出現嘅時候，我又可以憑咩投訴 lowroll？決定容許呢 2% 嘅情況出現嗰個係我，噉佢真係出現咗，噉咪係我嘅問題囉。

而掉轉嚟睇，成唔成功做到一件事都可以用同一個 mindset 去理解。喺話自己做唔到一樣嘢而放棄嘅時候，都要問自己有冇將自己成功嘅機會放到最大。的確，呢個世界好多嘢都唔由我哋控制。攞我一個醫科朋友做例子，佢話醫科嘅專科位置其實好有限，而亦都有唔少嘅醫科生因為父蔭或者 uncle 嘅協助一早霸咗嗰啲位。與此同時，我 law 呢行嘅情況都好類似——international firm 嘅位就有限，有「關係」嘅law graduates 就大把，一早霸定某啲嘅機會。不過我自己嘅心態就係，即使喺呢啲限制之下，我都有好多嘢我可以主動去 equip 自己，提升自己嘅成功率。而喺我自己可以令到自己嘅成功率最大之前，我都未有資格瀨自己 lowroll，冇 uncle 幫我鋪路。

就係因為呢啲 mindset，我越嚟越唔鍾意啲人用「唔好彩」去解釋一啲非純運氣嘅結果。而我要成為一個更好嘅自己，都需要摒棄將問題歸咎運氣嘅心態。唯有噉樣先可以幫到我正視問題。