用盡手上嘅牌

Hi,

今日想用一個我最鍾意嘅 YouTuber 嘅一條新片做引子。條片就講到呢位 YouTuber 個仔有自閉症，亦解釋咗其實自閉症好多時候都係因為患者唔識 filter 外來嘅資訊，所以先有難以同人溝通嘅問題。我自己覺得條片拍得幾好，有興趣嘅可以睇吓下面條片。

條片最觸動到我嘅，係佢話 "The successful life is one we leave the world better than you found it"。而喺條片度，佢亦都展現咗呢啲有人可能覺得係「社會負累」嘅自閉症患者，對其他人嘅 net positive impact，可能仲多過好多喺世上作惡嘅人。

而的確，能唔能夠為世界帶嚟多啲 net positive impact，可能就係一個衡量自己應該做啲咩嘅一個重要指標。我自問都算係一個極度 privileged 嘅人：屋企環境好，讀書唔錯，生活上無嘢需要擔心。老老實實，其實我唔使刻意去推自己去做啲咩，道理上我未來能夠為世界/社會帶嚟嘅 net positive impact ，應該好容易多過好多冇我咁 privileged 嘅人。

然而噉唔代表我咩都唔使刻意去做。我嘅情況就好似鋤大D嘅時候俾人派咗一手好牌噉，我咩都唔刻意去做，都好大機會贏到隔嚟嘅人。不過既然得到呢手好牌，就應該全力打好佢，噉先唔會對唔住我面前呢手牌。我見到 follow 我 studygram 嘅人，都有啲人背景同我相似。既然大家都有一手好牌，就全力打好佢。

我曾經有個錯覺，覺得自己「無咩特別」，或者覺得自己既然比唔上其他人，就等其他人負責做「為世界帶嚟 net positive impact」嘅職責，而自己就渾渾噩噩過世。但係呢個其實唔合理嘅——無論我哋點比較，都總會有啲人係比自己更 privileged 嘅——至少，你嘅起跑線點都唔會前過李嘉誠個仔或者孫，係咪？既然我手上嘅牌就係我能夠擁有嘅最好嘅牌，噉無論如何，總之打好佢就係我應該要做嘅事。

Cheers,

Ryan