捐錢定 Virtue Signalling?

Hi,

今個禮拜想講嘅嘢係上個禮拜嘅延續。甚至可以話係上個禮拜想講嘅話題，不過諗唔到點樣落筆寫，最尾就冇寫到。

今次想講嘅依然係關於自閉症嘅嗰條片，以及捐款呢件事嘅本質。

網上經常會見到「捐錢」會有好多問題。下面 list 幾個出嚟，大家都應該有共鳴。我唔係想借呢個機會喺呢到 trash on 上次 share 條片入面嗰個 Colour the Spectrum Event —— 我自己都已經經 YouTube 捐咗錢去嗰個 event —— 我只係想寫低我自己對於捐款嘅困惑，然後講吓點解即使我有咁多問題，都依然選擇去捐俾嗰個 event。

籌款活動或者慈善機構好多時有呢啲問題：

1. 行政費好高，捐出去嘅錢好多時候都會入咗啲高層袋。宣明會啲故事大家都聽得多。

2. 即使行政費低，而且捐出去嘅錢都真係擺入去嗰個 cause 度，但其實未必嗰個所謂「解決方案」真係幫到人。例如上年嘅 Team Trees Event 都有人話種咁多樹都唔夠抵消美國排放嘅碳。（btw 上次都有捐）

3. 捐錢好多時會轉移咗我哋嘅注意力。一個對於呢啲 event 嘅批評，就係佢好似買贖罪券噉。當一個人捐咗少少錢，好容易就覺得自己做咗自己需要做嘅嘢，然後就繼續自己嘅生活。例如捐咗俾啲環保組織，就會更加容易浪費資源噉。

呢啲都係一啲我覺得「捐錢」呢個行為本身所擁有嘅問題。

而當我將個鏡頭拉遠少少，一個新嘅問題亦都出現：我捐錢其實係為咗乜？係咪畀人睇？

當我決定寫呢篇關於捐錢嘅 blog 嘅時候，我見到兩個問題：第一、我會唔會令人覺得我其實係想 "flex" 自己捐咗錢，做緊一啲 virtue signalling 嘅行為？第二、如果我因為上面嘅問題而決定唔講自己有冇捐錢去呢個 Colour the Spectrum 嘅 Event，又會唔會顯得好似喺度指指點點噉？

呢一連串嘅問題就令到我對於寫呢個 topic 開始有啲卻步，而所以上個禮拜最尾都係冇寫到呢個 topic，凈係 share 咗條片就算。

噉係乜嘢原因令到我最尾都寫咗呢篇 blog，以及亦都捐咗錢去呢個 Colour the Spectrum 嘅 event？我自己覺得，其實上面好多問題都係好難解決，或者唔係由我控制。不過其實我手頭上嘅選項，只有「唔捐錢」或者「揀一個信得過嘅機構嚟捐」，而其他嘅選項都及唔上呢兩個。不過正如我幾個月前嘅 Studygram Post 都有講，尤其當唔肯定要做咩嘅時候，Do Something 通常都係一個唔錯嘅選擇。噉見到今次嘅 Event 係嚟自我最鍾意嘅 YouTuber，而個 Cause 都直接同佢（個仔）有關，我揾唔到一個原因唔去捐俾呢個 Event。

至於 Virtue Signalling 嘅問題，我亦都諗通咗。當我喺 2019 年捐俾 Team Trees 呢個籌款活動嘅時候，都冇同過任何人講，噉其實我捐錢嘅出發點道理上應該唔係去 Virtue Signal 畀人睇。噉只要我嘅出發點唔係去「表演」畀人睇，而係希望幫到個 cause 的話，噉我落筆寫呢個 topic，都應該冇問題。

Cheers,

Ryan