偏方系考試策略

由頭三年從未試過 law course 攞 A，到之後兩年次次 law course A-range

前言

一百個學生有一百種應試方法，呢度分享嘅只係我嘅方法，以及點解我採用一個同其他人唔同嘅方法。我會講點解我覺得自己個方法好啲而其他人嘅方法冇咁好，但唔代表人哋嘅方法係錯，亦都唔代表你唔可以採用其他人嘅方法。尋找適合自己嘅方法係必經之路，下面嘅分享希望可以喺你搵自己嘅考試策略嘅時候有多啲靈感，而唔係想話呢個方法係唯一正解。

我下面會先講自己設計策略背後嘅原因，之後先講個策略本身。原因係如果唔明點解我要制定一個噉樣嘅策略，喺實行嘅時候好容易偏離目標。希望你唔好因爲覺得唔重要而跳過咗呢幾個部份。

另外，呢個策略係特化應對 law 嘅 problem based question 嘅方法。如果你係讀其他科嘅都相信會有得着，不過記得按自己需要調整。

目標

喺講策略之前，先講清楚我哋嘅目標係乜先。我嘅考試策略嘅目標結果只有一個，亦都係唯一一個目標：考試入面攞 A range。呢個意味住我嘅策略係圍繞住考試本身制定，而唔係按科目調整。呢個亦都代表我爲考試準備嘅筆記只係爲我去考試而存在，而唔係一個第時用嚟複習返呢個科目有啲乜嘢概念嘅道具。

搞清楚呢個目標，就可以開始理解考試嘅本質。我會本住 begin with the end in mind 嘅精神，由最尾一步開始講，最後先講第一步應該點做。

考試嘅本質

既然我嘅目標係考試攞A range，噉就要研讀考試係一件點嘅事。下面呢點好重要：

考試係出題者爲咗分辨好同差學生而設計嘅道具

當中有三個重要嘅元素

第一，設計。份考試卷唔係憑空喺石頭爆出嚟。份考試卷永遠都係有個人喺後面設計份卷入面每一隻字同每一句句子，之後先整合成爲你見到嘅考試卷。換言之喺考試卷入面每一隻你見到嘅字都係出題者刻意放落去嘅。知道呢一點嘅時候，作爲應試者嘅你必須要先知道出題者點解要放嗰隻字入去份考試卷入面，之後先可以正確噉回答條問題。可以噉講，你唔明一隻字喺份卷嘅意義就少一分，唔明十隻字就坐底少十分，大概就係咁重要。

第二，考試係用嚟分辨好同差學生。一份出得好嘅考試卷係應該要能夠分辨攞C、攞B、攞A-、攞A同攞A+嘅學生。所以通常一份卷會有啲好淺嘅題目，中等程度嘅題目，以及少少極其困難嘅部份。如果你嘅目標係攞 A range 嘅時候，就要分辨到份卷入面邊一部份係用嚟分辨 B 同 A 嘅學生，然後盡快寫完啲簡單啲嘅部份之後用較多時間諗吓點樣可以喺嗰啲部份顯得好過其他人。實際行動嚟講可以係講吓嗰啲部份有啲咩學術討論，點解個未有結論，兩邊各自有啲咩論點支持，同埋你覺得邊一邊合理啲。當你花多咗時間去寫一啲用嚟分辨攞 A 同攞 B 學生嘅部份嘅時候，自然就更加高機會攞到 A。

第三，出題者。考試嘅出題者通常都係 lecturer，而當 lecturer 設計份考試卷嘅時候，一定會出返佢上堂講過嘅嘢。反轉嚟講，即係上堂冇花時間講嘅嘢，就唔係於考試而言重要嘅資訊。由於準備考試嘅時間有限，作爲應試者應該做嘅，就係將重點放喺啲有教嘅嘢度。有時佢畫公仔畫出腸，講明乜嘢重要嘅時候，就更加需要擺時間入去準備嗰啲部份，因爲你知道考試好有可能會考嗰啲部份。

關於考試本質嘅進階理解

下面嘅部份係一啲對考試本質更進階嘅理解及應用，不過需要使用者習慣嘅考試模式先適合使用。如果上面關於考試本質有任何一個對你嚟講係啲新嘅資訊嘅時候，就請審慎考慮係咪要睇下面呢個部份。

頭先講到考試係用嚟分辨好學生同差學生，而要攞 A 就要花多啲時間喺啲用嚟分辨 A range 同 B range 學生嘅部份。將呢點推遠啲嘅時候，呢個意味住改卷嘅人需要能夠將你份卷分辨爲好過其他人嘅一份回應。所以要提升自己被分辨爲一份好過其他人嘅一份卷嘅機會，其中一樣可以做嘅嘢係嘗試想像其他人會喺呢個部份寫啲咩。當你想像到人哋會寫咩嘅時候，就行多一步，寫多少少，寫好少少，同埋用多啲角度寫深少少，就能夠令到你份卷可以顯得好過其他人，令到改卷嗰個人可以畀個 A 你而唔係其他人。

與此同時，由於考試嘅本質係同其他學生比較，所以我自己會避忌呢一類型嘅題目：同 tutorial 嘅題目越相似嘅問題，我就越唔會去做。原因係因爲 tutorial 嘅時候已經討論過相關嘅問題的話，代表住大部分學生都熟習嗰條題目有啲乜嘢重要嘅論點需要討論，亦都清楚兩邊有啲咩強同弱嘅論點。喺呢個前設下，代表如果我答呢題要顯得好過其他人將會十分困難。

我都可以試吓作啲新嘅論點去嘗試拗嘅，但係呢啲新嘅論點冇喺 tutorial 嘅時候討論過，唔單止有機會錯，即使唔係錯亦都代表 tutor/lecturer 覺得呢啲論點冇佢攞出嚟講嗰啲咁好。所以基於要令到自己份卷顯得好過其他人嘅目標，如果啲題目同 tutorial 嘅問題越相似，我就傾向越唔揀嗰啲題目。

另一個重點就係出題者就係 lecturer。認知到呢一點嘅時候，就明白點解我覺得 lecture outline 咁重要，而佢個重要程度會高過教科書以及其他嘅 reading。再講多次，我嘅考試策略嘅唯一目標係喺嗰一科入面攞 A，所以我會推自己去做到嘅嘢係去熟習出題者傾向出啲咩，會想出啲咩，同埋覺得邊個課題嘅乜嘢 point 重要。要摸到出題者諗緊啲咩，就要透過 lecture, tutorial 以及 lecture outline 呢啲佢自己寫嘅嘢去推斷乜嘢先係嗰個題目嘅重點，以及考試會點樣出，點樣寫佢先鍾意。甚至乎我都唔差在講埋呢句：有時如果我知道某啲部份唔係 lecture outline 重點嘅時候，就會直情唔會點準備嗰啲題目。當然呢個係比較進階嘅應用，如果唔係真係好有信心嘅就唔好冒咁大風險，照 prep 啦。

落筆一刻

上面講咗我哋份卷嘅最後結果係點樣，跟住落嚟就講我哋落筆去建立自己份考試卷要注意嘅重點。

有時考試會有兩三個睇落都有得拗嘅方向可以答條題目而要揀一個嚟做。當面對呢啲情況，可以用 Occam’s Razor 嘅原則處理：當有多種選項嘅時候，選擇較直觀或者簡單嘅方向去答條問題。譬如有方向 A 同方向 B，如果方向 A 嘅答案會承接唔到條題目嘅其他部份，就避免選擇方向 A。攞個讀 equity 嘅例子，例如如果揀方向 A 去答條題目會令到個信託成立唔到，但係條題目後面嘅分析係需要你假設個信託成功成立到，就唔好同條題目作對，揀個答題方向係令個信託成立到。

用呢個原則嘅原因有兩個。

第一，正如頭先所講，每份考試卷後面都有一個出題者，而個出題者唔係黐線的。佢出得一條題目道理上條題目應該係合理嘅。所以如果你見到你選擇嘅答題方向會令到條題目唔合理，通常都唔係因爲條題目本身唔合理，而係因爲你選擇嘅方向錯咗先令到條題目睇落唔合理。

第二，通常揀一啲較複雜嘅方向答問題都冇好結果。呢個就純粹係經驗之談，好多時候係作答者諗多咗先會令到條題目複雜，而出題者其實出得條題目就應該係畀大部分學生有機會去答啱嘅。所以當有幾個睇落好接近嘅方向可以揀嘅時候，揀個簡單啲嘅方向去回答問題通常都冇死。

而呢個思考模式亦都連帶到去下面一點。當完全唔知條題目可以用咩方向作答嘅時候，可以諗吓 lecture outline 講過乜嘢重點。其實所有考試嘅本質都有選擇題嘅影子：出題者出得一條問題，必然係能夠透過佢教過嘅方法或者知識去作答。換言之考試要做嘅嘢，只係需要喺佢教過嘅重點入面揀一個方向去作答，仲唔係似選擇題？所以當唔知點樣去處理一條問題嘅時候，千祈唔好嘗試去發明啲法律原則或者發明啲方法。諗返教過啲咩，學過啲咩，再喺入面揀睇落最接近嘅去作答，就比較高機會答啱。作啲新嘅嘢永遠一定係錯嘅。

最後一個大家都講嘅重點，我唔怕長氣就講多次，就係 formatting 真係好重要。想像吓改卷嗰個一次要改成百幾二百份卷，如果你你寫啲字要好畀心機先睇得明佢都冇心情睇啦。我知自己手字唔係特別靚，所以我自己永遠都會隔行寫。如果有需要甚至乎會隔兩三行先寫下一句，方便改卷嗰個睇清楚我啲字。而且第一段我一定會畀個大綱出嚟講吓我嘅答題方向，以及用標題去將我嘅回應分開唔同部份，方便改卷嗰個，等佢哋唔會睇漏咗啲重點。

整筆記

終於嚟到你哋最想睇嗰部份：我係點樣整筆記嘅。

我自己整嘅筆記睇落係非常簡陋，簡陋到我好有信心每一個睇到我份 notes 嘅人都會諗「吓呢個人寫緊啲咩出嚟呀？」不過呢個只係外人嘅角度。對於整呢份筆記嘅我嚟講，呢個係精煉而唔係簡陋。

我整嘅筆記目標只有一個，亦都係同成個策略一致：就係用嚟考試攞 A 嘅。所以我筆記入面唔會有達成唔到呢個目標嘅任何資訊。再講清楚啲，即係我只會喺我份筆記入面寫我會喺考試嘅時候寫低嘅資訊，而如果我 picture 唔到自己考試嘅時候會寫嗰啲嘢，我就唔會將嗰啲嘢擺入筆記，全力精簡自己份筆記。

要知道嘅係，考試嘅時間非常有限，每一個案例通常淨係寫到二十至三十個字就要開始講下個重點。換言之其實啲筆記寫到天花龍鳯都冇用，去到考試嘅時候其實都淨係可以將個案例提煉成二十至三十個字寫出嚟。

既然係噉，點解我唔一早開始喺整筆記嘅時候已經將個案例提煉成爲一個得二三十字嘅精華？與其考試嘅時候先提煉，不如一早提煉定，熟習咗我會用邊二十個字去講嘅案例，噉我咪唔使喺考試嘅時候先嚟諗囉。

呢個就係我整筆記嘅方向，相信同出面所有賣筆記嘅人整嘅筆記完全唔同。我自己以考試攞 A 爲唯一目的，而唔係用嚟講成科啲概念畀人聽。當我整筆記係用嚟畀自己睇自己用，結果亦都自然唔同。

雖然噉講，但係整筆記對我嚟講都係一個準備考試嘅一個極其重要嘅過程。留意個動詞係「整」筆記，而唔係「睇」或者「買」筆記。喺整筆記嘅過程，我會考慮以下幾樣嘢：

第一，個課題以及啲案例嘅重點係啲咩。正如上面所講，我整筆記嘅唯一目標係應對考試。所以我會透過睇 lecture outline，自己嘅 lecture notes，以及 tutorial 講過啲咩嚟去推敲返考試可以喺呢個課題考啲咩。有時候個 lecture outline 會講一堆嘢，但係諗吓就知其實唔會喺考試出現，呢啲我就會準備少啲；又或者調轉，一邊睇份 lecture outline 就好容易想像到出題者可以點樣考嘅時候，就會準備多啲。我會喺整筆記嘅時候睇清楚啲案例係點應用個原則去個情況度，再將佢提煉成爲一個得一句咁長嘅總結。

第二，我會諗自己答條問題嘅時候會揀邊啲案例去答，以及點樣去鋪排我個回應，先去寫字入啲筆記度。嫌我煩都要講多次：整筆記係用嚟考試，所以筆記入面嘅每一個元素都要爲考試服務。有時可能一個課題有 5 個案例喺 lecture outline 嘅，但係諗吓都知考試嘅時候唔會五個案例都講晒。當有呢啲情況嘅時候，就可以喺整筆記嘅時候諗定考試嘅時候會抽邊兩三個案例嚟講呢個題目，然後就諗定考試嘅時候會點樣鋪排呢兩三個案例嘅原則。

第三，有乜嘢重要事實令到個案例噉判。你見出面啲筆記好多時候會用五六行去寫某個案例發生啲咩事。唔係話噉樣唔好，而的確寫多啲係可以幫到睇筆記嗰個明白成個案例發生咩事。但係考試嘅時候永遠唔會有機會畀你去寫咁多行咁多嘢，單單係去描述某個案例嘅事實。所以喺整筆記睇案例嘅過程，我會記低一個，頂多兩項事實係令到呢單案例動搖到個官去發展新嘅法律原則，然後就淨係寫嗰項事實。一樣又係以考試爲本嘅整筆記方向，你嘅筆記應該係爲考試服務。

必須強調嘅一點係呢啲咁精煉嘅筆記一定要自己整先有用。喺整筆記嘅過程入面包含消化成個 lecture outline，搵邊啲案例係對個出題者嚟講係重要，然後睇個案例，提煉個原則，挑選個重點事實，然後將所有資訊濃縮成幾十個字。成個過程係熟習自己考試嘅時候落筆寫啲咩嘅重要一步。整完一份筆記就等如準備咗一次考試嘅時候自己會寫啲咩落去答題紙上面，知道自己會點樣將成個案例同原則落筆變成十幾個字，再加埋做 past paper 嘅練習，熟習考試節奏，先能夠考好個試。

雖然我自己唔反對人去買筆記，亦都覺得佢哋係值嗰個價嘅，但係我想講嘅係整筆記係一個難以取代嘅準備考試方法。你買嘅筆記無論質素幾好，都失去咗整筆記嘅過程同埋練習去諗考試點寫嘅機會。再講，出面嘅筆記成日 sell 自己有好多好多頁，永遠唔會幫你提煉到得返兩三句考試嘅寫法。而當你冇睇過個案例嘅時候，自然唔知邊個 point 先係重點，淨係可以寫到啲好表面嘅嘢。唔係話噉樣唔好，不過唔會攞到 A 囉。

整筆記以外嘅方法

講完點樣整筆記，就到其他幫助到準備考試嘅方法。個方向一樣，都係以考試爲本，嘗試用各種方法去摸熟出題者會點樣出卷改卷。

第一，做 past paper 同埋睇 examiner’s report。道理簡單：知道以前啲出題者係點樣出卷，即使冇答案都至少可以知道佢哋覺得邊啲課題係重要同埋傾向點樣出。然後自己做份 past paper 嘅過程亦都可以熟習自己應對考試嘅節奏。同埋寫落嘅時候通常都會發現自己份筆記有啲漏咗嘅位或者未諗得夠好嘅位，又可以改善份筆記。基本上有幾多 past paper 我就會睇幾多 past paper。

至於 examiner’s report 嘅作用就係去睇吓以前教呢科嘅老師覺得啲學生有乜嘢做得好，乜嘢做得唔好，從而得知佢哋覺得嗰一科嘅考試卷上面應該要寫到啲咩先會畀個 A。尤其係知道以前啲學生有乜嘢做得唔好，就可以特化嗰部份嘅能力，當你考嘅時候做到，自然又有得令到自己份卷突出。

第二，認真上 lecture。喺 lecture, tutorial 同 reading 三樣嘢入面，我覺得最重要嘅就係 lecture。原因係 lecture 係出題者直接同學生講佢覺得乜嘢重要嘅一個環境，可以直接得知考試嘅時候乜嘢重要，幫到我去準備考試。所以我覺得 lecture 係永遠唔可以唔上嘅，即使冇上到都一定要睇返錄影或者問人攞筆記。如果三樣嘢入面淨係可以揀一樣去做，我一定係揀上 lecture。

第三，認真準備 tutorial。我之前拍過條片去講點樣應付佢，不過如果想攞 A 就自然唔可以淨係應付咗佢就算。Tutorial 又係另一個 lecturer，即係出題者設計嘅一系列題目，你可以將佢當成一個微型嘅考試，每準備一次 tutorial 就等如準備咗一次考試會出嘅題目，幫你熟習嗰個課題入面有啲咩重點。而我亦都會喺準備 tutorial 嘅時候寫定一個完整嘅答案，即係當我喺考試嘅時候見到呢條題目我會寫低嘅所有嘢，一段段噉用句子寫低而唔係寫得一兩句去幫自己練習，就好似當做 past paper 噉。原因同上面大同小異我就唔再講多次了。

第四，上 tutorial 嘅時候多啲講嘢，甚至乎多啲犯錯。既然 tutorial 係一個微型考試，我自然會想有人去幫我改份考試卷。如果我答啱當然好，不過答錯亦都冇問題。喺一班人面前犯嘅錯所獲得嘅教訓一定係最深刻嘅，所以我永遠唔會怕 tutorial 嘅時候喺其他人面前講啲錯嘅嘢，錯咪錯，我肯定我自己考試嘅時候唔會再錯先。如果睇緊呢篇嘅你同我上過 tutorial 你就一定知我 tutorial 嘅時候答啱嘅機會得 50%，甚至乎更少。我知喺 tutorial 嘅時候答錯唔會有 cost，只有 upside，所以我經常會喺 tutorial 嘅時候講啲我冇乜信心嘅答案，去保證自己學到嘢。

如果你驚噉樣做會畀朋友喺 tutorial 之後笑，點算？簡單，咪唔好同朋友 reg 同一個 tutorial 囉。

第五，關於 reading 嘅用途。reading 係上面三樣嘢（lecture, tutorial, reading）入面唯一一樣唔係由出題者準備嘅，換言之佢對推敲考試出咩嘅作用係最低，亦都係點解我高度反對直接刨 reading。我覺得 reading 係噉樣用嘅：當我準備某個課題嘅時候，有一個喺 lecture outline 上面嘅法律問題唔明，再加上直接睇個判決都依然唔明嘅時候，我先會去睇 reading。噉樣可以保證我睇 reading 嘅時候學到嘅嘢係直接同考試有關。由於 reading 通常會將個課題講到非常深入，深入到好容易唔知自己要吸收啲咩同埋撈亂資訊，所以我唔會刨 reading，反而係有嘢唔明先去睇返個 reading 去解答我心目中嘅問題。

我唔會做嘅事：關於其他人嘅考試方法

去到最後一個部份就會講少少其他人嘅整筆記方法，以及點解我唔採用嗰啲方法。呢個部份唔係想去踩其他人，而係想畀一個更全面嘅角度去解釋我採用自己嘅方法嘅原因，亦都希望睇呢緊呢份嘢嘅你都可以考慮埋呢啲因素。

我唔推崇啲人整份筆記出嚟係一個極其詳盡關於嗰個課題嘅所有資訊。唔係話整份噉樣嘅筆記唔好，其實非常好添，如果整到份噉嘅筆記出嚟一定對嗰啲課題有極其深入嘅認識，對未來出嚟做嘢一定有幫助。呢個其實就係我同佢哋目標唔同，所以先有唔同嘅整筆記方法。我自己整筆記嘅目標就只有喺考試攞 A 一個，所以我嘅筆記只會爲考試而服務。一啲考試嘅時候未必會出現嘅課題，或者一啲我推敲到個出題者覺得冇咁重要嘅課題，我就會將啲精力慳返去準備其他部份。人嘅精力有限，強行記到嘅資訊亦都唔係好多，所以我會分配自己嘅記憶去一啲對考試更有利嘅部份。當然如果你嘅記憶力特別強嘅話我都唔會反對你咩都準備晒嘅，不過我清楚自己嘅弱點所以先唔會噉做啫。

而且我都唔鍾意同其他人一齊準備啲筆記。我聽過有啲人會一齊準備同一科，每人負責一個課題然後又係寫好多準備得好詳盡。我一樣唔係想話呢個方法錯，不過個弱點一樣好明顯，就係你損失咗整筆記過程學到嘅提煉資訊嘅過程。再講，有時呢個真係好講你識嘅人係咪真係好似你咁叻，如果信錯人你就無端端冇咗一個課題嘅料，發覺出事嘅時候分分鐘已經太遲。如果你有一班好信得過嘅朋友，當然都可以選擇噉樣做啦，我唔會反對嘅，只不過呢個唔係一個我會選擇嘅做法啫。

後記

對我嚟講，其實所有 law 嘅科目都係同一科。我學嘅唔係嗰科嘅內容，而係學點樣去讀個 lecturer 諗緊啲咩，學點樣去預測份考試卷，同埋讀點樣去令到我份考試卷好過其他人嗰份。所有技巧都係特化於考試上面，所以我嘅考試成績一直好平穩：頭三年大部分 law course B+, 之後兩年所有 law course A-/A。唯二攞 B 嘅 law course 就只有 Legal Theory 同 Legal System。

所以對我嚟講，個 law 嘅內容並唔係我準備考試嘅重點，我只需要知道個 lecturer 想點然後配合就夠。當然你話長遠嚟講噉樣做好唔好，又真係未必好嘅，始終我噉做就唔會好熟悉個 law。不過又噉講，我宜家係做 soli 唔係做 bar，如果唔係做爭議律師，到時個關鍵技能都未必係個法律知識，而係點樣去讀個客想點同埋點樣令到個客滿意呢類嘅技巧。我噉樣去準備考試，唔係正正就係訓練緊未來我需要嘅技巧咩？

呢篇嘅主題係「偏方系考試策略」，而我都好清楚呢個方法係偏方而唔係正攻法。我自己都曾經採用過正攻法去準備考試，去讀個嗰科而唔係讀個 lecturer，但係顯然唔成功，而我轉咗方法之後就次次攞A。

點樣應用我講嘅方法就留返畀你決定了，加油。